KHAWTHLIR

Special Olympic
Social Welfare department, Sports & Youth Services department leh SSA-te chuan Ministry of Youth Affairs bultumin nimin khan Champhai Chhangphut Field-ah rualbanlote pualin ‘Special Olympic Bharat, Mizoram Chapter - 2018’ an huaihawt. Special Olympic-ah hian Champhai district-a rualbanlote an tel a, infiamna hrang hrang hmangin an intihsiak. Champhai district-ah hian rualbanlo 940 vel awm anga chhût a nih thu sorkar thuchhuah chuan a tarlang.

Donor's Meet sawn
MJA Public Library-in an hnena lehkhabu petute puala March 15, 2018-a 'Donor's Meet' buatsaih an tum chu rokhawlhna a awm avangin March 29, 2018-ah sawn a ni.

Heroin man
Central YMA hnuaia SRS-te chuan nimin khan Airfield Vengah Lalruatfela hnen aṭangin heroin hawng 5 an man a, Aizawla hralhna ang chuan Rs. 1,75,000 hû a ni.

Hmalakna awm lo
PWD minister Lal Thanzara chuan INC member RL Pianmawia zawhna chhangin, Darlawn khelmual leh Tourist Lodge panna kawng blacktop turin hmalakna a awm rih loh thu leh, NH-150 enkawl turin Darlawnah PWD Division office dah tumna a awm rih loh thu House a hrilh.

MR vaccination
Nimin khan Champhai District Immunization Task Force Committee chu an chairman Lalsangpuii Hmar, district bawrhsap hoin DC Conference Hall-ah an ṭhu a; April 16, 2018-a ṭan tur Measles-Rubella (MR) vaccination kalpuina tura hmalakna hrang hrang an thlirho. MR vaccination hi district-a naupang thla 9 aṭanga kum 15 inkar mi 40,461 hnena pek tum a ni.

Lo hâl hun tawp
Vawiin March 15 hi Mizoram sorkarin kumina lo hal hun hnuhnunga a puan a ni. Hmun tam takah chuan lo hâl a ni tawh a, vawiinah pawh mi eng emaw zatin lo an hâl beisei a ni. Sorkar chuan, March 15 hnu lama lo hâlte chu hrem theih an nih thu a lo puang tawh a ni.