House-in Motion of Thanks a pawm Mizoram ṭhan dan a lawmawm - Hawla

Mizoram State Assembly budget session ṭan ni, March 13, Thawhlehnia Governor-in thu a sawi chungchanga lawmthu sawina, Motion of Thanks, Cong­ress member H Zothangliana put luh chu nimin khan sawiho a nih hnuah pawm a ni.

Motion of Thanks sawihonaah hian chief minister Lal Thanhawla chuan, Mizoram hmasawnna ṭhan dan chu lawmawm a tih thu sawiin, Mizoram ṭhanna pawmpuitu chu anmahni lam ni loin, mithiamte leh NITI Aayog an nih thu a sawi.

Lal Thanhawla chuan, "Kan state hmasawn dan hi a lawmawm a, kan growth rate hi a ṭha hle a ni," a ti a; Central GDP aia Mizoram GDP a san thu leh, India rama state growth rate ṭha pali zingah Mizoram a tel thu leh, national average aia per capita income a san zawk thu a sawi a ni.

NLUP chu nasa takin sawi­chhiat ni ṭhin mah se, NLUP chu state-in hma a sawn phah hle niin a sawi a, state ṭhan dan tehnaa Mizoram a san chhan pakhat chu NLUP a nih thu a sawi bawk.