Kum 2017-18 chhungin MR bill-ah Cheng nuai 11,267.84 sen ring

Finance minister Lalsawta chuan nimin khan Assembly session-ah MNF member Lalrinawma zawhna chhangin, sorkar kum kal lai, 2017-18 chhungin medical reimbursement (MR) bill atan Mizoram sorkarin cheng nuai 11,267.84 a sen rin a nih thu a sawi.

Finance Minister tarlan danin, Mizoram sorkarin MR bill atan kum 2013-14 chhungin cheng nuai 8,515.47, kum 2014-15 ah nuai 7,712.15, kum 2015-16 ah nuai 7,809.09 leh kum 2016-17 chhungin nuai 9,421.95 a seng a; kum 2017-18 chhungin nuai 11,267.84 hman rin a ni bawk.

Zawh belhna chhangin Lalsawta chuan, MR bill-te dik taka tih a nih theih nan a khawihtu tur bik din a nih thu a sawi a, "The Mizoram Health Care Society din a ni tawh a, April 1, 2018 aṭangin hna an thawk ṭan ang," a ti a; Mizoram Health Care Society chu a nih dan tur ang taka a thawh chuan MR bill atana sorkar sum sên a tlakhniam an beisei thu leh, family declaration-ah fimkhur tur leh dik taka ti turin sorkar department tinte hriattir an nih thu a sawi.