Tlabunga MHA hnuaia hna thawhte chawlhtir

Tlabung Progressive Society (TPS) chuan, Ministry of Home Affairs hnuaia Tlabung leh a chhehvela hna hrang hrang thawh mekte tàwpsan turin a enkawltu pahnih - Engineering Projects India Limited (EPIL) leh National Projects Construction Corporation Limited (NPCC)-te nimin khan an hriattir.

TPS tarlan danin, Zophaia thil thleng chu ngawihbopui mai a nih lohna tur te, Hailakandi DC leh ramria duty Assam police-te'n an phu tâwk hremna an hmuh theihna tura Ministry of Home Affairs (MHA) kar nan, Tlabung leh a chhehvela MHA hnuaia hna thawh zawng zawngte tiamchin awm loa chawlhsan turin hna thawktu leh a enkawltute an hriattir a ni.

TPS chuan, "Thil thleng chhui chiang a, a mawhphurtute hrem an nih theih nana hma la turin MHA kan phût. MHA aṭangin hmalak­na kan hriat hma chu MHA hnuaia hna hrang hrang thawh mekte hi chhunzawm kan remti dawn lo a ni," an ti.

Mizoram sorkarin ramria chêngte hmasawnna tur a ngaihthah ṭhin vangin Mizote'n ram zau tak an chán tawh tih sawiin TPS chuan, ramria khuate leh mipuite ngaihsak a, an hmasawnna tur ngaihtuah turin Mizoram sorkar an phût a ni.