Congress-in MZP thutlukna lawmawm an ti
Congress party chuan thuchhuah siamin, MZP-in Bairabi Zophaia Zofate Chawlhbûk sak leh tuma March 14, 2018-a hnatlang an koh an ṭhulh leh chu lawmawm an tih thu an tarlang a, "Nunna tam tak chàn theihna hial dinhmun pumpelh tura an inphahhnuai thei hi Mizo tlawmngaihna dik takah kan ngai," an ti.
MPCC chuan, Mizoram ram chin humhalh tuma MZP-in ke an pênna vanga thu lêngvâk tam tak, a bikin social media hrang hranga a awm chu Mizo mipui tithlabártu a nih avangin pawi an tih thu an sawi a, "Congress sorkar demna thâwm nasa tak awmte pawh thil hriat zîktluak loh vang a ni," tiin, a mualpho thei tur ang bera sorkar bei duhtute an awm ṭhin vang niin an sawi.
Zophaia hriamhrei keng lo Mizo zirlaite Assam sorkarin a sipaite hmanga tianga vuak mai duh tâwk loa silai hmet puaka thisen an chhuah chu an dem tak zet tih sawiin MPCC chuan, "Zirlai mai ni lo, Bairabi khaw mite bakah, chanchinthar thehdarhtu, a hmuna thil awmzia mipui hriat theih tura ngaihvena kal, press mi an ni tih hre reng chunga kut an thlakte kha a demawm mai ni loin, hmeichhia pawh sawi loa press mite zinga hmeichhia pahnih kut an thlakte kha inzahlohna nasa takah kan ngai. Hliam zawng zawngte hi zangnadawmna pe turin Assam sorkar kan phût tlat a ni," an ti.
Congress party chuan, Zophai buaina vanga India ram state dang leh ram danga awm Zo hnahthlakte’n zirlaite thlavâng an hauh chu thlamuanthlak an tih thu an sawi a; buaina lian zawk thleng lo tura theihtawp chhuahtu Central YMA, MUP, MHIP, MSU leh MKHC-te hmalakna lawmawm an tih thu an sawi bawk.