Mizoram leh Assam chief secretary-te Inbiaknaa Mizoram ṭanna turte thlirho
March 20, 2018-a New Delhi-a Mizoram leh Assam chief secretary-te ramri chungchanga an inbiak huna Mizoram aṭanga thu chhawp chhuah turte chu nimin khan chief minister Lal Thanhawla hoin Cabinet meeting room-ah sorkar mi pawimawhte'n an enho.
Ministry of Home Affairs secretary ruahmanna angin, March 20 khian New Delhi-a MHA office-ah Union Home Secretary kaihhruainain Mizoram leh Assam chief secretary-te an inbe dawn a; Mizoram aiawha tel tur chief secretary Arvind Ray chu Home additional secretary Lalbiakzama leh Home (OSD) David H Lalthangliana ten an ṭawiawm ang.
Inbiaknaa Mizoram ṭanna tur nimina sawihonaah hian CM Lal Thanhawla chuan, Mizoram sorkar aiawh turte chu an hnathawh a pawimawh tak zet tih hre chiang tura chahin, rilru fîm tak pu chunga Mizoram tan theihtawp chhuah turin a fuih a ni.
Nimina meeting-ah hian Land Revenue & Settlement leh Home department hotu te, Mizoram State Boundary Commission member te, political adviser to CM Lalrinmawia Ralte, secretary to CM Lalram Thanga leh principal adviser to CM RL Rinawma te an tel a; inbiaknaa pharh tur Mizoram sorkar lehkha pawimawh leh Mizoram sorkar ṭan chhan zawng zawngte chu a mal tê têin uluk takin an zir chiang nawn leh vek a ni.