HIV hrik pai mi 6,871-in ART an la mek

Mizoram State AIDS Control Society (MSACS) hnuaia HIV positive-te enkawlna lama thawktu, ART Centre-a thawkte chuan nimin khan NLUP Conference Hall-ah an hnathawh dan thlirletna hun an hmang a; MSACS project director Dr Lalmalsawmi Sailo-in a hmanpui. He hunah hian, HIV hrik pai mi 6,871-in ART damdawi an la mek tih an tarlang.

Dr Lalmalsawmi Sailo chuan, HIV positive hmuh chhuah tawhte zinga 90% tal ART Centre-ah enkawlna pek theih ni se a duh thu sawiin, "Natna inkai chhâwng zel tur nasa takin kan veng dawn a ni. Inenkawlna mamawhte'n ART Centre an pan zat zat theih nan thawktute ṭawngkam leh chêtziain awmzia a nei thui hle a ni," a ti.

MSACS epidemiologist Dr Richard Lalramhluna Chawngthu tarlan danin, kum 2006-a Mizorama ART Centre hawn a nih aṭangin ART Centre-ah HIV+ve mi 12,101 an inziak lut tawh a, tunah hian enkawl lai mi 7,455 awmin, mi 6,871-in ART damdawi an la mek a ni.

Kum 2017-18 kum chhunga ART lama thawktute hna thawh dan thlirletnaah hian UW-ITECH director Dr Anwar Parvez-in sorkar laipuiin India rama HIV hrik hmuh chhuah tawh phawt chu ART damdawi pek nghal theih an nih dan tur 'Treat All' program ruahman a nih dan a sawi a; India ramah HIV positive 88%-in enkawlna an dawn laiin, Mizoramah chuan ART Centre thleng phak chu 76% vel chiah an nih thu a tarlang.

Tun dinhmunah Mizoramah ART Centre panga - Aizawl Civil Hospital, Kuli­kawn Hospital, Lunglei Civil Hos­pital, Kolasib District Hospital leh Mamit District Hospital-ahte a awm a ni.