Zophaiah state pahnih police an la awm : Assam civil mi 200 vel an inthiar chhuak

Tun hnaia Bairabi Zophaia MZP-in Zofate Chawlhbûk an sak tumnaa buaina chhuak leh a hnua boruak sosáng vang nia ngaih theihin Mizoram leh Assam inrina bul hnaia cheng Assam mi eng emaw zat chuan an awmna an chhuahsan nia thu dawn a ni. Zophaiah hian Mizoram police leh Assam police eng emaw zat an la awm ve ve a, boruak ṭha lo dang thleng erawh a awm lo.

Thu dawn danin, Mizoram leh Assam inrina bul hnaia cheng Assam mite chu March 14, Nilaini aṭang khan an inthiar chhuak ṭan a, chhungkaw eng emaw zata mi 200 an inthiar chhuak tawh a ni. Hemi chungchanga zawhna chhangin Zophaia awm mek Mizoram police hotute chuan, an inthiar chhuah leh chhuah loh chu an hriatpui chiah lo a, mahse, Assam lam police hotute sawi erawh an hria tih an sawi.

The Telegraph chanchinbuin a tarlan danin, All Assam Minority Students' Union (AAMSU) Hailakandi District Committee chuan ramriah buaina a awm chhunzawm zel a nih chuan economic blockade huaihawt an tum a; AAMSU Hailakandi Committee president Fakrul Islam Laskar chuan Assam ram inchi khat pawh Mizoram hnena an pêk loh tur thu leh, AAMSU hmalak tum dante Assam chief minister Sarbanada Sonowal hnena an hriattîr thu a sawi a ni.

Fakruk Islam Laskar chuan, ramri boruak chu chinfel a nih loh chuan Assam aṭanga Mizorama bungaw lut tur zawng zawng dan chah vek an rilruk thu leh, ramri buaina chu ṭha taka sawifel an hreh loh thu a sawi bawk.

Hetih lai hian, Krishak Mukti Sangram Samiti (KMSS) Hailakandi unit pawhin NH-154-a Mizoram leh Assam inrina velah Assam police checkgate dah an phût thu Assam CM hnenah an thlen a; ramri bul hnaia cheng Assam mite an him loh thu CM hnenah an thlen tih, KMSS Hailakandi secretary Jahir Uddin Laskar chuan a sawi tih tarlan a ni.

Hailakandi DC Adil Khan chuan, March 10, 2018-a buaina chhuakah Mizo hmeichhe journalist-te kut thlak an nih chungchang chu an chhui zui mek niin a sawi bawk.

Thu dawn danin, Bairabi Zophaiah hian Mizoram police, MAP leh IR police 400 vel an la awm reng a, 1st. IR commandant HL Thangliana'n a ho a ni. An ep lamah Assam police eng emaw zat chu hmanrua leh bungrua chi hrang hrang nen an la awm ve bawk a, tun hnai tê aṭangin battalion commandant-in a awm chilh thar ve leh a ni.