KHAWTHLIR

Thisen pe
Hrangbana College NSS chuan nimin khan an college-ah blood donation camp an huaihawt a, zirlai mipa 62 leh hmeichhia 49-te'n Aizawl Civil Hospital tan thisen unit 111 an pe.

Thupek sût
FCSCA department chuan March 12, 2018-a aṭanga Mizorama petrol leh diesel hralh/lei theih zat bithliah chu tuialhthei dinhmun a ziaawm chhoh tak avangin sût a ni a, bituk zat awm loin hralh/lei theih tawh a nih thu a tarlang. Hei hi nimin aṭang khan hman ṭan nghal a ni.

MHIP-in an dem
MHIP Gen. Hqrs. chuan thuchhuah siamin, journalist hmeichhe pahnih - Emmy Ci Lawbei leh Catherine C Sangi te, journalist an nihna leh hmeichhia an nihna zah loa Assam police-te'n kut an thlak chuan an rilru a tihnat thu an tarlang a, "Assam police-te thil tih leh pawisawi lote kut an thlak hi kan dem tak zet a, kut thlaktute hi chhui chian a, hrem an nih ngei theih nan thuneitute'n chak takin hma la se kan duh a ni," an ti.

Chanchin Tha Thlen Ni hmang
Presbyterian Kohhran chuan nimin khan Chanchinṭha Thlen Ni an hmang. He ni pual hian nizan khan kohhran tinah inkhawm neih a ni a, thupui thlan bik ngaih­thlak a ni. March 15 hi Rev. William Williams-a'n kum 1891-a Mizoram leilung a rah champha a ni.

London-ah kal
DMR assistant director Dr Lalrokima Chenkual chu nimin leh vawiina London-a neih 20th. International Conference on Disaster and Emergency Management-ah a tel a, paper a present dawn a ni.

Tlan phal lo
Lawngtlai DC Dr Arun T chuan Kaladan Multi Modal Transit Transport Project kawng siam hna kal lai a buai loh nan March 13, 2018 aṭanga thu leh awm hma chuan kawng siamtu company, emergency vehicle, law & order duty leh armed force-te motor tih loh, lirthei dang zawng chu KMMTTP kawngah tlan phal a ni lo tih a puang.