Assam police-te chet dan chungchangah RS MP Ronald Sapa Tlau-in hma a la

March 10, 2018-a Bairabi Zophaia Assam police-te chêt dan leh hmeichhe journalist pahnihte leh mi dangte kut an thlak dante chu Rajya Sabha MP Ronald Sapa Tlau-in March 14 khan Union Home minister Rajnath Singh hnenah ziakin a thlen a; March 13 khan New Delhi-a Indian Women's Press Corps (IWPC) pisaah a thlen bawk.

Ronald Sapa Tlau chuan, Assam police-in buaina an siamna hmun chu hmanlai aṭang tawha Mizoram chhung, Mizoram chief minister hmasa ber Ch.Chhunga ram a nih thu te, kumin February 27-a MZP-in chawlhbuk an sak chu Assam police-in an ṭhiahsak thu te, March 8 leh 10-a MZP-in sak ṭhat leh an tum chu Assam police kut an thlak a, silai an hmeh puah hial thu te, mi 49 an hliam thu te, hliam zingah chanchinbumi hmeichhiate pawh an tel thute a hrilh a ni.

Rajya Sabha MP chuan, Mizo zirlai mi tlemtete laka firing order petu Hailakandi DC chungah dan anga action la tura Assam sorkar hrilh tur te, MZP leh Mizoram media mite an hliam avangin ngaihdam dil tura Assam sorkar hriattir tur leh, hliamte hnenah zangnadawmna pe tura hrilh turtein Home Minister a ngen.

Ronald Sapa hnenah hian Indian Women's Press Corps (IWPC) hotute chuan, Assam police-te chêt dan chu mak an tih thu leh an dem thu an sawi a; chanchinbumi hmeichhia thlenga kut an thlak chu an hriatthiam theih loh thu leh a mawhphurtu zawn chhuah ngei an duh thute an sawi bawk. IWPC hian Assam police-te chet dana an lungawi loh thu Assam Chief Minister hnenah an thawn nia thu dawn a ni.

MP Ronald Sapa Tlau hian March 13 vek khan Rajya Sabha Chairman hnenah Assam police-te chet dan chu ziakin a thlen bawk.