Tel ṭha loa rinhlelh chhui zui Ṭhatlohna hmuchhuak rih lo

Tun hnaia Mamit khawpui chhunga tél (hriak) ṭha lo (mihring tana pawi thei tura ngaih) lak luh a nia sawi leh puanzar chu Food, Civil Supplies & Consumers Affairs (FCSCA) department-in bawhzuiin an endik a, an tih theih chinah chuan télte chu a ṭhat lohna an hmu lo. Food & Drugs Administration endiktir leh tum a ni.

Mamit DC Dr Lalrozama chuan Vanglaini palai zawhna chhángin, tél chungchangah hian mipui aṭangin complaint a luh avangin FCSCA leh Legal Metrology lamte enfiahtir an nih thu a sawi.

Mamita FCSCA department hotute leh Legal Metrology en­forcement-te chuan February 3-4, 2020 chhung khan Mamit khawpuia dawr hrang hrangah tél him tâwk loa sawite chu an enfiah a; an tih theih chinah chuan, télte chu a ṭhat lohna leh hlauhawmna an hmu lo a ni. FCSCA department leh Legal Metrology hotute hian an thil hmuh dan leh rawtna an neihte chu February 4, Thawhlehni tlai khan Mamit DC hnenah ziakin an thlen nghal.

FCSCA department leh Legal Metrology lamin a ṭhat lohna hmu lo mah se, Health department-a Food & Drugs Administration lam aṭanga hmalakna kalpui zui chi nia a lan avangin tél ṭha loa sawi kawltute chu hralh chhuak lo tura hriattir an ni. Hemi chungchangah hian Mamit DC chuan, "FDA lamin an enfiah turin buaipui mek a ni a, tun kar tawp lamah hi chuan an rawn endik hman kan beisei," a ti.