Eptuten NLUP thlanna lehkha an hmu lo : Tuipui loh vangah minister-in a puh

Nimina Assembly session-ah eptu MLA-te'n NLUP thlang tura tih an nih ve loh thu an au chhuahpui. Hemi chungchangah hian Agriculture minister KS Thanga chuan, NLUP Implementing Board (NIB) lamin NLUP tuipui ve lo MLA-te an hmaih palh a nih a rin thu a sawi.

MNF member K Sangṭhuama zawhna kal zelah opposition group leader Vanlalzawma chuan, NIB aṭangin February 4, 2018-ah lehkha thawn chhuah a nih thu a sawi a, "Lehkhaah hian MLA-te chu an bial chhunga mi 400 ṭheuh NLUP dawng tur thlang tura tihna a ni," tiin, lehkha an dawn ve loh thu a sawi a ni.

MNF member Lalruatkima chuan, NIB lehkha chu eptu MLA tih loh MLA dang zawng pek vek an nih thu a sawi a, "MLA-te hi NLUP dawngtu tur thlangtu tur an ni em ni? NLUP hi sorkar flagship programme ni loin, party flagship programme a ni ringawt a lawm," a ti.

Agriculture Minister chuan, NLUP dawngtu tur thlan hna chu NIB kut a nih thu sawiin, "NLUP hi a hlawhchham kan hlau a, a tuipui ve lo MLA-te chu an pe lo palh a ni ang," a ti a; a tuipui MLA-te chuan NIB aṭangin lehkha an dawn thu a sawi.

KS Thanga chuan, NLUP anga scheme ṭha khawvelah a awm a hriat loh thu sawiin, "Prime Minister pawhin state dangte entawn turin a ti hial a ni. Hetiang programme ṭha hi Mizoramah a la awm ngai lo," a ti.

Agriculture Minister tarlan danin, NLUP hi chhungkua 1,34,689 pek a ni tawh a, chuta tan chuan cheng nuai 1,29,306.50 sên a ni. Mi 16,000 pek a ni leh dawn a, chuta tan chuan cheng vbc. 80 ruahman a ni.

NLUP ṭanpuina pekte zingah hlawhtlinpui tam tak an awm a, chumi chungchang zirchianna impact analysis neih mek a ni. Zirchianna zawh a nih hunah chauh NLUP hlawhtlinpui zat hriat theih a ni ang.

NLUP chungchangah hian chief minister Lal Thanhawla chuan, MLA inthlan zawhah epty party lian ber President chuan NLUP chu an hneh loh ber a nih thu a sawi tih tarlangin, "Hei hian NLUP hlawhtlinna a tichiang. NLUP hi Congress-in kan economy policy zinga kan ngaih pawimawh ber a ni," a ti.