March 28-a inlan turin Court-in CM a ko

Kum 2013-a Mizoram State Legislative Assem­bly inthlanah affidavit dik lo hmanga puh a nih chungchangah chief minister Lal Thanhawla chu March 28, 2018-ah Court-a inlan turin Serchhip Chief Judicial Magristrate-in a hriattir.

Serchhip CJM-in hriattirna a pekah hian Lal Thanhawla chu amah emaw, a aiawha ding tur emaw Court-a inlan ngei tura tih a ni a; amah emaw, a aiawh emaw an kal lo a nih pawhin, an tel loa thubuai ngaihtuah tho a nih tur thu a hriattir a ni.

Tarlan tawh angin, Lalhriatrenga Chhangte, New Serchhip chuan CM Lal Thanhawla chu kum 2013-a inthlanah Serchhip biala ding tura nomination paper a theh­luhah affidavit dik lo a thehlut nia a hriat avangin February 17, 2018 khan Court-ah thubuai a thehlut. Lal Thanhawla lakah hian criminal complaint no.1/2018 U/S 190 r/w Section 200 of Cr.PC ziah luh a ni.