Lokayukta atan hun a la duh deuh mai thei - CM

Chief minister Lal Thanhawla chuan, Lokayukta chu Mizoram sorkarin din thuai duh mah se, hun a la duh deuh mai theih thu nimina Assembly session-ah House a hrilh.

MPC member Lal­thanliana zawhna kal zelah Chief Minister chuan, Lokayukta din tura an hmanhmawh theih loh chhan pakhat chu, Lokayukta hotu atan hnam dang ni loin, Mizo ngei awm thei se an duh vang niin a sawi.

Lal Thanhawla chuan, Selection Committee-ah Gauhati High Court Chief Justice chu member a nih ve thu sawiin, "Ani hi meeting turin a lo kal thei lawk lo. Tunah hian kan hrilh leh a, member-te remchan tlan hun nghah a ngai. A rang thei anga din kan duh chungin, hun eng emaw chen chu a la duh mai thei," a ti.

Law & Judicial minis­ter Lalsawta chuan, Lok­ayuk­ta chairperson leh member tur atan Search Committee-in shortlist an neih tawh thu sawiin, "Heng mite hi an bio-data kimchang nen Selection Committee-ah thawn a ni tawh," a ti a; Selection Committee-in ngun taka an ngaihtuah hnuah thutlukna an siam tur thu a sawi.

Lalsawta sawi danin, Lokayukta dinna tur hian officer leh staff post 35 ruahman a ni a; post atana recruitment rules pawh peih a ni tawh a, DPAR-ah thawktu lak dil mek niin, phalsak an nih veleh post hnawhkhat tura hmalak a ni ang.

Lokayukta atan hian building luah tur thlan a ni tawh a, building chu chei ṭhat hna ṭan tum mek a ni a, rent agreement pawh buaipui mek a ni.