Kristianna nuai chimih tumte laka fimkhur a ṭul - ZPM Chairman

Ṭangrual pawl Zoram Peoples' Movement (ZPM) chairman Lalliansawt chuan, India rama Kristian sakhua nuai chimih tumtu BJP lakah Kristiante fimkhur a ṭul thu a sawi a, "ZPM ṭangrual pawl tan thurualpui a rem lo," a ti.

ZPM-in nimina an pisaa chhung inkhawm an neihah Lalliansawta chuan thu sawiin, "BJP bulpui Sangh Parivar tum lian ber chu kum 2021-ah India ram puma Hindu sakhua chauh awmtir tura sakhaw dang nuai chimih a ni. Hmarchhak bialah pawh kum 1961 daih tawh aṭangin ruahmanna mumal tak siamin bul an lo ṭan tawh," a ti a; BJP hmabak awmchhun chu Mizoram a nih thu a sawi.

ZPM Chairman chuan, BJP-te chu tunah hian Aizawlah hmun pathumah an inbun tawh tih sawiin, "Inthlannaa chak hi an tum ber a la ni lo, thuneihna hmanga Kristianna nuai chimih a ni. Chuvangin, kumin kum tawpa kan inthlan hunah Mizote hian Kristianna kan hum dawn nge kan nuaibo dawn tih kan bûk dawn a ni," a ti.

Inkhawm kaihruaitu, ZPM general secretary K Sapdanga chuan, ramrîa zirlaite'n Assam police silaimu leh kutthlak an tawrh leh a kaihhnawih chungchang a sawi a, “Memorandum of Settlement-a hming ziaktu Congress leh MNF tan ramri thu sawi ve a remchang tawh lo a, an ngawih mai hi an thiamawm a ni," a ti a; Mizote'n Mizoram chin nia an ngaih sawi ri thei awmchhun chu ZPM chauh a nih thu a sawi.

K Sapdanga chuan, zirlaite'n silai an hmachhawn lai pawhin ZPM ṭhalaite'n a hmunah an chàm chilh tih sawiin, "Hliam pawh an tuar ve hial. ZPM Val Upa Council Chairman pawhin ṭhalaite thlavâng hauhna a au chhuahpui bawk. Ṭangrual pawl a sorkar chuan, Assam nena kan ramri hi Mizote lungawina khawpa siamṭhat a nih hma loh chuan ngawrh takin kan nawr zel ang," a ti.