IPR-in journalist-te thla hualna hun an hmang

Information and Public Relations (IPR) department chuan nimin khan an audtorium-ah Assam police kut tuar Mizo chanchinbumite thlavang hauhna leh thla hualna hun an buatsaih a, IPR minister Lal Thanzara'n a hmanpui.

Lal Thanzara chuan, jour­nalist-te chu mipui hriat tur pawimawh puangzartu an nih thu sawiin, "Mipui rawngbawl hna an thawhna tiṭhuanawp tur zawnga Assam police-te'n Mizo journalist kut an thlak mai hi a pawi tak zet. Ka lungawi lohna pawh Assam sorkar hnenah ziakin ka thlen tawh," a ti.

Mahni nunna thâpa silai mu kara mipui rawngbawltu press mite chhuanawm a tih thu sawiin IPR Minister chuan, "Hliam tuarte ka tawrhpui tak zet a ni," a ti a; March 20-a Mizoram leh Assam ramri chungchang sawihona New Delhi-a neih turah Mizoram Chief Secretary-in Mizo journalist-te kut an thlak chungchang chu an sawi chhuah dawn thu a sawi.

Minister KS Thanga pawhin thu sawiin, journalist-te laka Assam police chet dan chu India democracy ropui tak bawh­chhiatna leh ram timual­pho­tu nia a hriat thu a sawi a, "Indona hmunahte pawh chhinchhiahna kengin press mite an kal fo a, van­duaina vanga hliam tuar leh thite pawh an awm ṭhin. Tihpalh thil thu ni lo, tum rêng vanga police-te'n chanchinbumite kut an thlak erawh hi chu press mite zalen­na rahbehna nasa tak a ni," a ti.

Inkhawm hi IPR director David L Thangliana'n a kaihruai a, IPR secretary Biaktluanga, MJA president Vanlalrema Vantawl leh vice president Zo­nunsanga Khiangte te pawhin thu an sawi a ni.