KHAWTHLIR

Chhawmdawlna pe
Disaster Management & Rehabilitation (DMR) minister C Ngunlianchunga chuan Assembly session-a Nihar Kanti Chakma zawhna ziaka chhangin, kum 2017 fur laia Khawthlangtuipui len vanga huan leh chenna in chhiate chhawmdawlna atan Rs. 50,00,000 pek a ni tawh tih a tarlang. Chhawmdawlna hi chhungkaw 382 hnenah Rs. 3,200 ṭheuh leh chhungkaw 37 hnenah Rs. 1,01,900 ṭheuh pek a ni.

Tractor pek zat
Agriculture minister KS Thanga chuan MNF member Dr. K Beichhua zawhna chhangin, custom hiring centre 71-te chu tractor leh leilehna pakhat ṭheuh pek an nih tawh thu House a hrilh a, "Custom hiring centre hi SMAM aṭangin 47 leh RKVY aṭangin 47 din a ni," a ti.

Hman zawh hman beisei
Planning minister Lalsawta chuan MNF member K Sangṭhuama zawhna chhangin, kum 2017-2018 atana NEDP hnuaia sum dah cheng vbc. 750 chu financial year chhung ngeiin department-te'n an hman zawh theih a beisei thu House a hrilh.

Mi 1,088 admit
February 2018 chhung khan Aizawl Civil Hospital-ah mi 30,509 an inentir a, mi 1,088 admit an ni. Nau piang 337 an awm laiin, mi 50 an thi a; damlo mi 228 chu state páwna inenkawl tura tih an ni.

NLUP sem
Nimin khan Mamit Chhimveng YMA Hall-ah NLUP ṭanpuina sem a ni a, an hun hmanpuitu bialtu MLA John Rotluangliana chuan, NLUP chu mahnia bul ṭan thei lote tana bul an ṭanna tura ṭanpuina a nih thu a sawi. NLUP ṭanpuina hi third phase hnuaia mi 46 hnenah Rs. 13,02,253 leh fourth phase hnuaia mi 44 hnenah Rs. 12,90,960 sem a ni.

Mei zu 20 man
Aizawl District Anti Tobacco Squad chuan nimin khan Aizawl New Market huam chhung leh Zarkawt chuanhnuai lama sumdawng lirthei (public transport)-ahte COTPA Section 4 bawhchhia an awm leh awm loh an enfiah a; New Market huam chhungah phal lohna hmuna mei zu mi 20 leh lirthei khalh chunga COTPA bawhchhia mi 13 an man.