Barh luih ramri pawm lo turin ngen

Joint Action Committee on Inner Line Reserved Forest Demand (JAC on ILRFD) chuan thuchhuah siamin, March 20, 2018-a New Delhi-a Mizoram leh Assam chief secretary-te inbiakna turah, barh luih ramri, Mizote ráwn loa lo siam tawh chu pawm lo turin Mizoram sorkar aiawhte an ngen.

JAC on ILRFD chuan, Mizoram leh Assam sorkar aiawhte ramri chungchanga an inbe tur chu lawmawm an tih thu an sawi a; chutih rualin, "Barh luih ramri Mizote ráwn loa an lo siam hi pawm lo turin kan sorkar kan ngen tak zet a. Lal Suakpuilala leh sap hoin saui an lo tanna ramri kham sa, kum 1875 hi nei let tura ṭang tlat turin kan ngen. Kum 1875-a ramri kham hi inchi khat pawha tawlh lo turin kan sorkar kan phûtin kan ngen tak zet a ni," an ti.

JAC on ILRFD chuan, "Zo fate leh Mizoram mipui hian Assam ram hi inchi khat pawh kan nêkin kan dil lo a, kan ram dik tak, ramri kham sa kum 1875 hi kan duh leh kan demand chu a ni," an ti a; Assam chu Mizoram hmelma leh do an ni lo a, buaina siamtu tam ber chu Bangladesh aṭanga dan loa rawn lutte an nih thu sawiin, chu'ng mite chu Inner Line Forest Reserved area square mile 509 chhung aṭanga chhuak turin an phût a ni.

Bairabi Zophaia MZP-in chawlhbuk an sak tumnaa buaina chhuak vanga hmun hrang hranga awm Mizote leh Mizorama chengte'n ram hmangaihna an pu thar chu lawmawm an tih thu leh, ram humhalh chungchangah ṭangrual zel tura Mizote an duh thu an tarlang bawk.