Thuneihna chan dan leh vote zawnna Ngaihtuahah Congress sorkar an puh
MPC ṭhalai chuan thuchhuah siamin, kum 2018-19 Mizoram budget pharh tâk chu rorel lai Congress party-in ram hmasawnna aia thuneihna an chan theih dan tur chauh an ngaihtuahzia tilangtua an ngaih thu an tarlang. PRISM pawhin, Mizoram budget thar chu ram hmasawn tumna aiin vote zawnna budget ni zawka an ngaih thu an sawi.
MPCY chuan, Mizoramin sem policy a ṭhatpui lohzia mipuiin an hmu nia sawiin, "Tlawmngai pawl leh kohhran hoin an sawisel reng chung leh Comptroller and Auditor General report pawhin a hlawhchhamzia an tarlang chunga a, sem an la tum hi mak kan ti. Kan ram mamawh ban phâk renga a awm chung pawha an haider lui tlat hi pawi kan ti tak zet a ni," an ti.
MPCY chuan, Aizawl khawpui zauhna lam ngaihthah a ni zel chu a la pawi dawn thu sawiin, "Kawngpui chêp vanga harsatna zozaite hi hai rual a ni lo. Chhiatni ṭhatni leh hun bitukah kan thlen hun tura kan thleng hman ta lote hi Mizoram sorkar mawh liau liau a ni," an ti a; Brig. T Sailo hmalakna leh hmachhawpte ûm zui a ni lo chu pawi an tih thu an tarlang bawk.
PRISM party chuan, Mizoram budget 2018-19 chu vote zawnna budget a nih thu sawiin, "Mipui mamawh phuhrûk tumna budget ni pha loah kan ngai," an ti a; mipui hriselna leh hri danna lama inthlahdah an tum nia ngaih theihin Health department chu nikum aiin pawisa pek tlem an nih thu an sawi.
PRISM chuan, MLPC Act hnuaia chhiah hmuh zat tura ruahman chu kum hmasa aiin a tam zawk tih sawiin, "Mizoram sorkarin nasa zawka zu zawrh a tum ni ngeia langin nikum aiin zu chhiah hmuh hnem tum a ni a; chutih laiin, zu khuahkhirh kawngah an inthlahdah dawn nia ngaih theihin Excise & Narcotics-ah nikum aiin sum an dah tlem zawk a ni. Chhiah tam zawk khawn tum ni âwm taka an lan laiin, chhiah khawntu ber Taxation department chu nikum aiin pawisa pek tlem a ni," an ti.
PRISM tarlan danin, electric bill nasa taka tihpun a nih dawn laiin Power & Electricity department chu pawisa pek tlem a nih thu te, milian ho nawmchenna belhchhah an tum nia ngaih theih turin Legislative Assembly, GAD leh SAD-te sum pek belh an nih thute an tarlang bawk.