Transport Minister-in online hmanga Department dawr theihna a tlangzarh

Mipuiin online hmanga Transport department an dawr theihna tur leh pawisa pek ngaite online hmanga an pek theihna tur 'Online Payment (Citizen Service)' tih chu nimin khan Secretariat conference hall-ah Transport minister TJ Lalnuntluanga'n a tlangzarh.

Tlangzarh inkhawm hi Transport secretary KT Beicho-a'n a kaihruai a; TJ Lalnuntluanga chuan, lirthei leh mipui chu inhne hnai tak an nih thu sawiin, "Lirthei nei kan pun zel bakah a hmangtu kan pung zel a, lirthei neitute leh a hmangtute tan department dawr a awlsam theihna zawngin department lam-in ngaihtuahna kan sêng nasa hle ṭhin a ni," a ti.

Transport Minister chuan, online payment chu hun eng emaw chen an buaipui tawh tih sawiin, "Buaipui ngai tam tak a awm avangin tihhlawhtlin vat theih a ni lo. Nikum aṭangin hripui a léng a, lockdown-te niin, mipui tan motor kaihhnawih chhiahte pekah harsatna kan tâwk a ni," a ti a, hripui vanga mipui harsatna tawh sutkianna atan online payment peih thuai turin chak taka hmalak a nih thu a sawi.

Sorkarna an chan hnua a department hmalakna sawiin TJ Lalnuntluanga chuan, "Tun sorkar a pian ṭan tirh khan motor registration-a lifetime tax pek ngai chu mipui tan phurrit a ni tih hriain thlak danglam a ni. Lifetime tax pek ngai loin kum 5, 10 leh 15 atan a petute duh dana thlan theih turin ruahman a ni," a ti.

Covid-19 avangin sorkar leh mipuiin harsatna hrang hrang an tâwk tih sawiin Minister chuan,"Sorkarin lirthei neitute harsatna hriain central sorkarin guideline a siam zúlzuiin February 1, 2020 aṭanga September 30, 2021 chhunga motor document thite chu valid-ah pawm a ni," a ti a; hun tiam chhungin motor document-te chu late fee chawi loin tihnun theih a nih thu a sawi.

Transport Minister chuan, hmeichhiate him zawkna atan Vehicle Location Tracking System bun tura hma an lak thu sawiin, "Kan inbun fel hunah chuan passenger transport vehicle-ah chuan vehicle tracking device vuah vek a ni ang. Passenger-in a sahimna kawnga harsatna a tawh chuan panic button hmeh tur invuah a hmeh chuan rang takin department leh police lamin an hre nghal thei dawn a ni," a ti.

Online Payment (Citizen Service) atan hian June 5, 2020 khan Transport department leh SBI-te'n payment gateway chungchangah thuthlung, Memorandum of Understanding an ziak a; chumi hnuah Transport department, SBI leh National Infomatics-te ṭangkawpin mipui hman theih turin an puitlin ta a ni.

Online payment-a tih theihte
1) License chi hrang hrang dil, siam thar, tihnun, address thlak, surrender of COV leh DL clubbing a tih theih; heng ti tur hian Sarathi Portal - https://sarathi.parivahan.gov.... ah luh tur.
2) Chhiah chi hrang hrang pek, duplicate RC, fitness renewal, ownership transfer, RC leh permit thi tihnun. Heng ti turte chu https://vahah.panvahah.gov.in/... ah luh tur a ni.
3) Passenger transport vehicle neitute'n harsatna an tawh fo - emergency emaw, ṭulna avanga route danga tlân a ngaiha route permit dila office an dawr ngai zel chu online-in dil theih a ni dawn. A ṭul angte chawiin route permit pawh online-in pek theih a ni ang.