Aizawla vawk vulh chungchangah AMC-in mipui zirtirna kalpui a rêl
Aizawl Municipal Corporation (AMC) chuan nimin khan AMC session hall-ah Board of Councillors' meeting an nei a; Aizawl khawpui chhunga vawk vulh chung changah mipui zirtirna (awareness campaign) nasa taka kalpui an rêl.
AMC BoC meeting hi mayor Lalrinenga Sailo-in a kaihruai a; zawhna leh chhanna hun hman a nih hnuah executive councillor Lalringliana'n Annual Financial Statements 2020-21 a pharh a, rorel chhunzawm a ni.
Aizawl khawpui thianghlim zawk leh mawi zawk neih theih nana hmalak dan tur an sawiho a; khawpui chhunga ran vulh, a bik takin vawk vulhin khawpui vawn thianghlim kawngah harsatna a thlen dante an sawiho hnuah, khawpui chhunga vawk vulh chungchangah mipui zirtirna nasa taka kalpui ni se, an ti.
Aizawla parking area hmun 51 enkawl tura thlante nena inremna (contract agreement) chu March 31, 2022 thleng pawhsei an remti a; diesel man a san zel avangin Aizawl khawpui bawlhhlawh paihna motor hman man chu 5%-a tihpun an remti bawk.