Assembly Speaker-in Lalduhoma ZLP-te nena inzawm a phalsak

MLA aṭanga bàn a nih hnua Serchhip bial MLA by-election-a Zoram Peoples Movement (ZPM) ticket-a thlan tlin Lalduhoma chuan Zo Peoples' Movement Legislature Party (ZLP)-te nen joint legislature party an din dawn. Lalduhoma hian Assembly speaker Lalrinliana Sailo hnenah ZLP-te nena joint legislature party din a dil a ni.

Vanglaini palai zawhna chhangin Assembly Speaker chuan, Lalduhoma dilna a pawmsak thu a sawi a, "Speaker thuneihnaah chuan legislature party dang zawm remtih loh theih a ni. Mahse, a dilna lo hnâwlsak hi ṭul ka ti lo a, ka pawmsak a ni," a ti.

Vanglaini thu dawn danin, joint legislature party-ah hian Lalduhoma chu leader a ni dawn a, ZLP leader ni lai Vanlalhlana chu deputy leader a ni ang.

Tarlan tawh ṭhin angin, Zoram Peoples Movement aṭanga inde­pendent-a MLA atana thlan tlinte chuan ZPM Legislature Party an din a, a hnuah Speaker-in a remtih tâk loh avangin ZLP an din leh a ni. ZLP-ah hian leader chu Lalduhoma a ni a, MLA aṭanga bàn a nih hnuah Vanlalhlana chu leader atan ruat a ni.