CYMA-in zirlai ti ṭhate an chawimawi

Central YMA chuan nimin khan Central YMA Hall-ah kum 2021-a HSLC leh HSSLC examination-a top 10-a Mizo lang mi 52 chawimawina an buatsaih.

Chawimawina inkhawm hi CYMA vice president Lalhmachhuana, YMA Kumpuan Sub-Committee chairman ni bawkin a kaihruai a; CYMA president Vanlalruata chuan, Mizoramin zirna uar a mamawh tih sawiin, "CYMA pawhin kumpuanah 'Zirna uar' tih kan hmang a, mahse, Covid-19 avangin kan tum angin kan kal hleithei lo a, kan rilruah erawh zirna a lian hle a ni," a ti a, zirna mumal lohna ram an dinchhuah ngai loh thu a sawi.

Vanlalruata chuan, zirlai pass ṭhate chu an vanneihna tiṭhuanawp lo tura chahin, "Zoram nghahfâk in ni a, nakina kan ram hruaitu pawimawh tak tak la ni tur in nih avangin in nun uluk ula, awm mai mai loin theitawp chhuah ang che u," a ti a; ram leh hnam tan an thiamnate hmang tur leh CYMA kumpuan hlawhtlinna an nih theih nan ṭan la turin a fuih.

Kumina HSLC top 10-ah mi 13, HSSLC-ah Arts subject top 10-ah mi 16, Science-ah mi 13 leh Commerce subject-ah mi 11, an vaiin zirlai 53 an lang. Zirlai 53 zinga 52 chu Mizo zirlai an ni a, mi 52-te hnenah chawimawina thuziak leh lawmpuina Rs. 1,000 an hlân a ni.