R Lalthangliana'n central a dâwr

Minister Dr R Lalthangliana chuan nimin khan New Delhi-ah sorkar laipui hotute a kâwm a; Union Health minister Mansukh Mandaviya hnenah Covid-19 léng thawh thumna thlen thulha Mizoram mamawh turte a thlen.

Dr R Lalthangliana hian Union Minister hnenah hian, Mizorama Covid-19 dinhmun tlangpui a sawi a; Covid-19 leng thawh thumna thleng thei laka Mizoram sorkar inpuahchahna leh Mizoram mamawh tur thil chi hrang hrang a thlen a ni.

JICA fund hmanga cheng vbc. 500 sénga Mizorama superspeciality cancer hospital din tur chu a rang thei bera ṭan turin R Lalthangliana chuan Mansukh Mandaviya a ngen a, Technical Appraisal Report a hlân nghal.

Dr R Lalthangliana hian World Bank sum hmanga Mizoram Health System Strengthening Project hna ṭan mek leh RIPANS tana kum 2009 bul lama cheng vbc. 480 sanction awm tawh aṭanga hmalakna chi hrang hrang ṭhuanawp rih tate a thlen bawk.

Minister R Lalthangliana hian DoNER secretary Dr Inderjit Singh a kâwm bawk a; India hmarchhak state tana 10% GBS ministry hrang hrangin an dah ṭhin chu National Education Policy 2020 tihhlawhtlin nan hman ṭangkai dan tur leh kalpui theih dan tur a sawipui.

DoNER Secretary hian state sorkarin utilisation certificate thehluh leh ruahmanna siam chungchangah Mizoram sorkarin a tih ve àwm chi-ah uluk leh zuala buatsaih turin thu a ràwn a ni.

Health Minister hian AYUSH secretary Vaidya Rajesh Kotecha pawh kâwmin, Mizorama AYUSH doctor zir chhuak tawh zingah hna hmu lo tam tak an awm thu a sawi a; PHC leh CHC hrang hrang leh tuna Health and Wellness Centre-a thawkte bakah, rawih belh theih dan tur kawng ngaihtuaha an hlawhte tumsak turin a ngen.

Mizoram district 11-a AYUSH hospital sakna tura ruahmanna tun hma lama a thlen tawh chu ngaituah ṭha leh turin a ngen bawk. Dr R Lalthangliana hian Micro Small & Medium Enterprise secretary BB Swain, Economic Adviser leh Joint Secretary-te pawh a kâwm a; Covid-19 avanga SEDP hmanga eizawnna ruahmannaa khaihlak leh harsatna awmte a thlen a ni.

Health Minister hi Delhi Mizoram House Resident Commissioner bakah, HTE director Nazuk Kumar leh official dangte'n an ṭawiawm.