Chhûmkhûm-Chawngte kawng a chhia, a chhiat hma chhan sawifiah an phût

ZPM, Lunglei South Block-III chuan thuchhuah siamin, Chhûmkhûm leh Chawngte inkar kawngpui, World Bank sum hmanga siam chu fûr khat pawh a zawh hmain a chhe leh nghal tih an tarlang a; a chhiat hma chhan sawifiah tur leh a rang thei ang bera siam nawn leh turin Mizoram sorkar an phût.

ZPM, Lunglei South Block-III tarlan danin, Chhûmkhûm -Chawngte inkar kawng chu double lane-a siam niin, a tìrah JKM Infra Projects-in an siam a, tunah chuan APS-in an la chhâwng tawha sawi a ni. Kumina fûr ruahtui tlak hmain a laih hna leh blacktopping zo fel nia inngaiin thawktute chu an insenghawi meka hriat a ni.

Chhûmkhûm -Chawngte kawng siam zawh hlim chu fûr khat pawh a zawh hmain hmun tam takah alkatra luan a khawk tawh tih sawiin ZPM-te chuan, "Boulder phah ni bawk si lo chu chirhdiaka motor táng nam ngaiin hmun tam takah kawng a chhe nghal vek a ni," an ti.

Culvert leh lungrem (retaining wall)-te pawh a chhe hle nia sawiin, "Kawng thlang lama leivûng chhêkin kawng siam sa a minpui nual tawh," an ti a; Lungráng leh Chawngte inkar chu hna thawktute'n an uluk lo zual a, kawng chhuatah boulder (lung) phah loin lei lâwngah an blacktop ringawt niin an sawi.

ZPM, Lunglei South Block-III chuan, Chawngte kawng chu kum tam tak Mizoram kawng chhe sawi nan tehkhin a ni ṭhin tih sawiin, "Khawthlang mipuite'n nghakhlel taka an thlir mek laia siam zawh ruala chhe nghal mai tura hna an thawk ngam hi khawthlang mipui zah lohna chiang tak a ni. Hna vila enpuitu Mizoram PWD leh a changtu minister-in a rang thei ang bera kawng chhe nghalte hi ṭha leh tlo ngei tura siamtir leh turin kan phût a ni," an ti.