Lungleiah Special Handloom Expo buatsaih

Sorkar laipuia Ministry of Textiles leh Mizoram Apex Handloom & Cooperative Society Ltd. (MAHCO)-te chuan nimin aṭang khan Lunglei Convention Centre tualah Lunglei Special Handloom Expo 2020 an buatsaih ṭan a, Cooperation minister C Lalrinsanga'n a hawng.

Hawnna inkhawm hi MAHCO managing director Lalrinawma Pachuau-in a kaihruai a; Minister chuan, Lungleia Special Handloom Expo buatsaih chu Mizorama cooperative movement hmasawnna pawimawh a nih thu a sawi a, "Puantahtute tana inphochhuahna, hralhna hmun leh mipui tan pawha awlsam taka an duh zawngte tlâwm zawka an lei theihna a ni a, zau zawka puantahtute kutchhuak tihlârna pawimawh tak a ni," a ti.

C Lalrinsanga chuan, Cooperation department leh Agriculture department-te ṭangkawpin Muga silkworm leh la chìn lamah chak zawka hmalak a, designer-te nen ṭangkawpa handloom industry tihchangtlun zel a duh thu a sawi a; handloom industry neitute chu ram páwna thawn chhuah tlak khawpa ṭha siam chhuak turin a chah.

Lunglei Special Handloom Expo hawnnaah hian Lunglei DC V Lalsangliana chu khualzahawm a ni a, Lunglei district HPC vice chairman Lawmawma Tochhawng, MLA leh sorkar official te, chanchinbumite leh tlawmngai pawl aiawhte pawh an tel a ni. Expo-ah hian stall 24 a awm a, vawiin leh naktukah chhunzawm a ni ang.