Khawthlangtuipui tihhmasawnna tur DPR central-in a pawm - TJ Lalnuntluanga

Transport minister TJ Lalnuntluanga chuan, Khawthlangtuipui/Tuichawng lui tihhmasawnna tur DPR sorkar laipuia an thehluh chu pawm a ni tawh tih a sawi.

Nimina Transport department tana online payment system siam thar a tlangzarhnaah TJ Lalnuntluanga chuan, August 27, 2021 khan Union Minister for Ports, Shipping and Waterways Sonawal hoa meeting-ah a tel thu a sawi a, "Inland Water Transport-a Mizoramin hma kan sawn ve theihna turte thlenin, sumdawnnaah leh tourism lama chhawr ṭangkai a nih dan turte ka sawi a ni. Ministry of Shipping hotute pawhin an ngai pawimawh a, hmalak a nih theihna turin an inhawng hle a ni," a ti.

Transport Minister chuan, Khawthlangtuipui tihhmasawnna tura DPR an siam chu pawm a ni tawh tih sawiin, "Tunah hian inspection team rawn tirin hmalak a nih nghal tur thuin min chháng. Chhimtuipui luiah Tuipui-D aṭanga Lomasu thleng lawngléng hmanga inkalpawh a nih theihna turin Ministry of Shipping-in techo economic feasibility study e-tender chhuah tura min ràwn tawh angin tunah hian e-tender chhuah tura peih tawh a ni," a ti a, tender chhuah thuai tum a nih thu a sawi.

Tlawng lui chu national waterway no. 102 atan puan tawh a nih thu sawiin TJ Lalnuntluanga chuan, "A taka hman a nih thuai theih nan kan dil nghal. Tlawng lui hi national waterway no. 102-a puan a nih avangin Ministry of Shipping-in direct-a hma a lak a ngai a, hemi atan hian an zir chiannaah bungrua phur lawng a kal theih an ring lo a, amaherawhchu, tunah hian passenger chuan theihna lawng a kal theih nan a rang lama hma min laksak turin kan thlen tawh," a ti.

Transport Minister chuan, "Mizoram luite hi phai ram luite nen a luan dan leh a ziaráng a inang lo a, a têin a khawkrawk bawk avangin zir chian zual bik ngai a ni a, chak taka hmalak zung zung a harsa," a ti a, theihtawp chhuaha sorkar laipui an nawr zel tur thu a sawi.