Covid-19 vei mi 3 thih belh

August 30, Thawhṭanni zan khan Covid-19 vei mi pakhat a thi a, nimin khan mi pahnih an thi bawk. Sorkar chhinchhiah angin, Mizoramah hripui vei mi 217 an thi tawh a, August thla kal mek bikah mi 69 an thi tawh.

Thawhṭanni zan dar 8:10 khan C Ringzuala (76) h/o Chunthangi, Armed Veng chu an inah a thi a, home quarantine lai an nih avangin a thih hnuah RAT hmangin a swab sample endik niin, Covid-19 positive a ni tih hmuh chhuah a ni. C Ringzuala hi nimin zing dar 8 khan an inah vui a ni.

Nimin chhun dar 12:30 khan Covid-19 vei enkawl lai JH Rualchhawna (84), Vaṭhuampui, Lawngtlai district chu Lawngtlai Bazar Venga a chenna inah a thi a, nimin vek khan vui a ni. Covid-19 vei a ni tih August 19, 2021 khan hmuh chhuah niin, Lawngtlai District Hospital (dedicated covid health centre)-ah August 25 aṭangin enkawl a ni a, in lama inenkawl an duh zawk avangin Thawhṭanni khan damdawi-in aṭangin chhuahtir a nih thu sorkar thuchhuakin a tarlang.

Lalzauva (81) h/o Rinthangi, Zemabawk pawh nimin tlai dar 4:55 khan hripui vangin State Referral Hospital-ah a thi a, nizan khan thlanmualah vui a ni. Thu dawn danin, amah hi thisen sang leh zunthlum nei sa a ni a; Covid-19 positive a ni tih August 28 khan hmuh chhuah niin, SRH-ah enkawl nghal a ni.