KHAWTHLIR

Lt. Col. Kawlkhuma
Mizorama Salvation Army dintu Lt.Col. Kawlkhuma chanchin corps sergeant major VL Hruaia ziah chu nimin khan SA Indian Eastern Territory chief secretary Lt.Col. SP Simon-in Aizawla Territorial Headquarter-ah a tlangzarh.

Arts zirna hawng
Lairam Isua Krista Baptist Kohhran enkawl, Lawngtlaia Lairam Higher Academy of Science-ah nimin khan arts zirna leh building thar chu LIKBK Assembly general secretary Rev Dr LH Lalpekhlua'n a hawng. Lairam Higher Academy of Science-ah hian kum li chhung science chauh zir theih a nih hnuah arts zirna hawn belh a ni.

Kuhva rah man
Serchhipa hmunpui nei Assam Rifles-te chuan August 30, Thawhṭanni khan Khawbung-Zawlsei kawngah kuhva rah ip 155 an man a, Customs Preventive Force, Champhai hnenah an hlan. Kuhva rah an man hi Rs. 27,50,700 hùa chhût a ni.

ZPM Zonu-in thláwp
ZPM Zonu Gen.Hqrs chuan thuchhuah siamin, ZPM working president atana K Sapdanga ruat a ni chu lawmawm an tih thu leh an thlàwp thu an tarlang. Tuirial bialtu MLA Andrew H Thangliana a thi chu an party tan chànna nasa tak a nih thu tarlangin, "Kan ui tak zet a, a kalsan a nupui fanaute Pathianin awmpui se tih hi kan ṭawngṭaina a ni. Tuirial bial mipui kan tawrhpui a, Lalpa’n bial enkawltu ṭha tak a pe leh ngei ang tih kan ring tlat a ni," an ti.

Pipe phûm dawn
Zarkawt Presbyterian Kohhran biak in leh senior officers' quarters inkar kawngah SIPMIU-in vawiin aṭanga September 10, 2021 thleng zing dar 9 aṭanga zan dar 8 inkarah pipe phûm hna an thawk dawn a, hei vang hian kawngpui chanve khâr a nih dawn thu Traffic SP Rodingliana Chawngthu chuan a tarlang. Hnathawh tibuai theia lirthei leh bungrua kawngpui sira dah khap a nih thu a tarlang bawk.