Hripui vei 1,157 hmuh belh a ni : Ni khata hmuh tam ber dawttu

August 30, Thawhṭanni khan Mizoramah Covid-19 vei mi 1,157 hmuh chhuah a ni a, Mizorama ni khata hripui vei hmuh tam lamah pahnihna niin, India rama hmuh tam lamah palina a ni. Nimin khan hripui vei dam tawh mi 219 chhuahtir an ni a, hripui vanga thi pathum an awm belh.

Covid-19 vei hmuh tharte chu mipa 590 leh hmeichhia 567 an ni a; ZMC laboratory-a hmuh chhuah 233, TrueNAT hmanga hmuh 68, RAT hmanga hmuh 852 leh Fluorescent Immunoassay (FIA) hmuh mi pali an ni.

August 30 khan India ramah Mizoram aia Covid-19 vei hmuh chhuah tamna state pathum - Kerala (19,622), Maharashtra (3,741) leh Tamil Nadu (1,523)-te chiah an awm. Hmarchhak state pariat zingah hmuh chhuah tamna ber a ni leh bawk a, chawlhkar khat chuang a záwnin hmarchhak biala hripui vei hmuh tam berna a ni tawh.

Hripui vei hmuh thar 1,157-te chu symptom nei 503 leh nei lo 654 an ni a; tualchhunga kái 1,155 leh tun hnaia state pawn aṭanga rawn lut pahnih niin, tualchhunga hri kái zingah kàina chin hriat loh mi 497 an awm.

IDSP record angin, Mizoramah Covid-19 vei 59,120 hmuh chhuah a ni tawh a, mipa 30,270 leh hmeichhia 28,850 an ni. Nimin tlai dar 5 thleng khan mi 50,017 (84.60%) chhuahtir an ni tawh a, mi 217 (0.37%) thi tawhin, enkawl mek mi 8,886 (15.03%) an awm.

August 30, Pathiannia sample endik dan chu - ZMC laboratory-ah 1,960, TrueNAT hmangin district pariatah 370 leh RAT hmangin district 11-ah 10,695 a ni a, a vaiin sample 13,040 a ni. Sample endik aṭanga hripui vei hmuh chhuah 1,157 chu 8.32% a ni a, ZMC-ah 11.89%, TrueNAT-ah 18.37%, RAT-ah 7.97% leh FIA-ah 28.60% a ni.

District tinah hripui vei hmuh chhuah dan chu - Aizawlah mi 679, Champhaiah 101, Kolasib-ah 88, Lawngtlaiah 87, Lungleiah 80, Siahaah 70, Mamitah 35, Serchhipah 12, Khawzawlah pali leh Hnahthialah pakhat an ni a; Aizawla veng 66 leh khua/hmun dang 66-a mite an ni a; Lungleia veng 13, Champhai, Kolasib leh Lawngtlaia veng 10 ṭheuh leh Siahaa veng pakuaa mite an tel. Ni khata hmuh chhuah tam ber dawttu a ni a, hmuh tam ber ní - kumin July 25-a hmuh zat chu 1,369 a tling.

Covid-19 vei hmuh chhuah thar 1,157 zingah nausen kum khat tling lo 12 telin, symptom nei an awm nual a, thla khat tling lo mi pahnih an tel. Kum 80 chung lam mi pakua awmin, an zinga pahnih chu kum 90 tling tawh an ni.

August thlaa ni 30 chhungin Mizoramah Covid-19 vei mi 20,195 hmuh chhuah tawh niin, hmuh tam ber thla a ni tawh a, chawhrualin ni tin mi 673.20 hmuh chhuah an awm ang a ni. Mizorama Covid-19 vei hmuh tawh zat 59,120 chu kum 2011 chhiarpui angin, Mizorama mi 1,000 zelah hripui vei mi 54 an awm ang a ni.

Nimin khan tlai dar 5 thlengin hripui laka fihlim tawh mi 219 chhuahtir an ni a; Aizawl district-ah mi 107, Lawngtlai district-ah 49, Kolasib district-ah 37, Mamit district-ah 18 leh Saitual district-ah mi pariat an chhuak.