Water Supply Scheme thar lungphùm phúm, Aizawl kan tibuai hrih dawn - UDPA Minister

Kum 2033 thlenga Aizawl khawpui hnianghnar taka tuia châwm thei tura ruahman, Tlawng lui Setlak lui chhuah aṭanga Laipuitlanga tui lak (pump) chhohna tur chu March 17, Inrinni khan PHE minister Zodintluanga'n Tanhril Mualkhang ram, Tlawng lui Setlak chhuah chhaka pumping station siamna turah lungphùm a phúm.

Augmentation of Water Supply and Construction of 37 MLD Water Treatment Plant lungphûmna inkhawm hi PHE secretary Dr C Vanlalramsanga'n a kaihruai a; minister Zodintluanga' chuan, hmasawnna hna thawh a nih avangin Aizawl khawpui an la tihbuai hrih dawn thu a sawi.

UDPA Minister chuan, hmasawnna hna an thawhnaah Aizawl khawpuiah kawngpui an tihchhiat nasat avangin UDPA department leh SIPMIU-in sawisel an tawh nasat thu a sawi a, "Vawiina a lungphûm kan phûm tak pawh hi a hlawhtlinna tur chuan kawngpui kan laih chhiat leh a ngai dawn. Thli chhia sawngbawlna tur kan siam mek avang pawhin hmun tam takah kan lo lai chhe tawh a ni," a ti.

Zodintluanga chuan, PWD-in kawng an siam hnu lawka laih chhiat a ni leh ṭhin thu sawi awm ṭhin chu an phat loh thu sawiin, "Hmasawnna hna thawh a nih avangin tih a ṭul si a ni. Water supply scheme thar hi kan zawh hunah chuan Aizawl khawpuiin tui hnianghnar takin an hmu tawh ang. Thli sawngbawlna zawh a nih chuan thli chhia a luang mai mai tawh lo ang a, leimin tur tam tak pawh kan pumpelh tawh dawn a ni," a ti a; mipuite chu hna an thawh chhung hrethiam hram hram turin a ngen.

UDPA Minister sawi danin, Asian Development Bank (ADB) leh Ministry of Urban Development chuan hmarchhak state khawpuite tihchangtlunna turin ruahmanna an siam aa; state-te hnathawh tur hrang hrang tuksakin, Mizoram chan turin cheng vbc. 300 an ruahman.

Hnathawh tur chu phase hrang hranga thawh tura ruahman a ni a, Mizoramin a hun takah Tranche-I a zo thei a, state dangin an zawh theih loh avangin Tranche-II chu Mizoramin a thawk lawk thei lo. Mizoram sorkarin Tranche-II an thawh theih tawh thu an thlen avangin ADB chuan Mizoram bik chu Tranche-II thawh phalna a pe a ni.

Khawpui dangin an thawh hleih theih tâk loh avangin state dang sum tur chu hna thawk thei awm chhun Tripura leh Mizoram sorkar pek belh a ni a; a tira Mizoram tana ruahman cheng vbc. 300 a nih laiin, state dang sum tur pek an nih tak loh avangin Mizoram chan tur chu cheng vbc. 703-ah a pung ta a ni. Sum hmuh belh hmangin Augmentation of Water Supply and Construction of 37 MLD Water Treatment Plant chu siam tur a ni.

Zodintluanga chuan, Aizawl Greater Water Supply Scheme Phase-I leh Phase-II ten Aizawl an châwm zawh tawh loh thu sawiin, "Phase-I leh II hian ni khatah tui litre million 34.8 a pump thei a, mahse, a khawl leh pipe-te a hlui tawh avangin hetiang zat hi a pump thei tawh lo. A tira ruahman ang pawhin pump thei se, tuna Aizawl khawpuiin tui a mamawh chu ni khatah litre million 56.6 chu a phuhru zo tawh lo," a ti.

UDPA secretary Dr C Vanlalramsanga chuan, Mizoram hmun hrang hrangah hmasawnna hna thawh a nih thu sawiin, "A bik takin Aizawlin tui hnianghnar a hmuh theihna tur leh thli sawngbawlna tur ngawrh taka thawh a ni," a ti a; hna an thawhnaah department hrang hrang nen lungrual taka an thawh ṭhin avanga lawmawm a tih thu a sawi.

SIPMIU project director Valbuanga sawi danin, Augmentation of Water Supply and Construction of 37 MLD Water Treatment Plant atan hian Setlak lui leh Tlawng in finnaah metre 6-a sangin tui khua a ni dawn a, chuta ṭang chuan Laipuitlangah tui pump tur a ni. May 9, 2016-ah hna thawh ṭan niin, June 2019-a zawh tura ruahman a ni a; contract amount chu cheng vbc. 156.76 a ni.

Project hi zawh a nih hnu chuan ni khatah tui litre million 37 pump chhuah theih a ni dawn a, water supply scheme awmsate nen kum 2033 thleng Aizawl khawpuiin tui hnianghnar takin a hmu thei dawn niin an tarlang.