Zofate Chawlhbuk sak tumna ram atana chhiah pek hnuhnun ber March, 2018
Mizoram chief minister hlui Ch. Chhunga (L) nupui, Lalrothangi (94) chuan, MZP-in Zofate Chawlhbûk an sakna hmun atana Bairabi Zophaia an ram an pekah tun thlengin Mizoram sorkara Land Revenue & Settlement (LRS) department-ah chhiah an la pek thu leh, chhiah an pek hnuhnun ber ṭum pawh March 5, 2018 kha a nih thu a sawi.
Lalrothangi chuan, Bairabi Zophaia an ram/leilet atan kumin March thla tìr khan Mizoram sorkara LRS department-ah chhiah an pek thu a sawi a, "Kan chhiah dawngtute'n min chhan leh si lo, kan leilet paltlanga NEC road laih tlang a nih laiin, Mizoram sorkarin compensation dil turin ti mah se, kan dil chuan Assam ram a ni tihna a nih dawn avangin kan dil duh lo a ni," a ti.
Lalrothangi sawi danin, Bairabi Zophaia an ramah hian kum 1987 aṭangin Mizoram sorkara LRS department-ah chhiah an pe ṭan a, an pek hmasak ber ni chu sorkarin a chhinchhiah dan chuan January 9, 1987 niin, hei hi document-ah pawh hmuh theihin a awm.
Bairabi Zophaia an ram chu an neihna a rei tawh tih sawiin Lalrothangi chuan, "Kum 1956 khan he lai ram hi kan nei ṭan a, kum 1957 pawh a ni zawk mai thei. Kum 1959-ah mautàm a awm dawn avangin a do lêt nan tiin leilet siam ila kan ti a, kan siam ṭan a ni," a ti. Zophaia leilet an siamin Assam ram aṭangin sawiselna an hre ngai lo a, Mizoram chhung ngei a nih thu sawiin, "Mizoram chhung ni hek," a ti.
Lalrothangi chuan, kum 1966-a ram a buai hma pawhin buh thar an neih ṭhin thu leh March 1, 1966-a ram a buai ní takah pawh Bairabi-a an leileta mi buh phur 70 chu an hnen a thlen thu a sawi a; chutih rualin, March 1, 1966-a an buh thleng chu an in a kan avangin an ei hman lo tih sawiin, "Kan in pumpui a kâng vek a, buh phur 70 lo thleng pawh kan ei hman lo. Rambuai vangin kan leilet pawh enkawl theih a ni ta lo a, kum 1980 velah bul kan ṭan ṭha leh a ni. Hetia leilet kan tharthawh leh hi mi ṭhenkhatin kan neih tirh emaw an ti mai mai niin ka hria," a ti.
Bairabi Zophaia an leiletah china thawktu vaite chu tun thlenga an la awm thu leh, tun hnaia MZP-in chawlhbuk an sak vanga buaina chhuakah an tlanchhe ve niin a sawi a; kum tin an leilet buh thar chu an zuk lâk ṭhin thu leh an lak hnuhnun ber chu kumin January thla chawlhkar hnihnaah a nih thu sawiin, "Hna thawk turin vai kan dah a, kum khatah phur 200 kan hauh a, a dang zawng an chang," a ti a, phur 200 chu an kum khat ei a nih thu a sawi.
Lalrothangi sawi danin, Bairabi Zophaia Ch. Chhunga (L) ram atan hian Lalrothangi te chhungkua chuan March 5, 2018 khan Land Revenue department-ah chhiah an pe.
Sorkarin a chhinchhiah dan chuan ram hi grade I & II-ah ṭhen a ni a; grade-I chu hectare 3.91-a zau niin, status of pass-ah 1/87 tia chhinchhiah a ni a, grade-II chu hectare 2.39-a zau niin, status of pass-ah 4/87 tih a ni.