Aizawl East-I South Block ZPM office hawng
Ṭangrual pawl, Zoram Peoples' Movement (ZPM) Aizawl East-I South Block office, Zemabawk Venglaia mi chu March 17, Inrinni zing khan ZPM general secretary K Sapdanga'n a hawng.
Office hawn inkhawm hi ZPM Aizawl East-I South Block president KC Lallianmawia'n a kaihruai a; K Sapdanga chuan, hun danglam takin Mizoram a tlakbuak a nih loh chuan kumin kum tawp lamah MLA inthlan a awm dawn tih sawiin, "Kum 30 chuang chu roreltu ngaiin min kaihruai a, kum 10 danah kan thlak ṭhin a ni," a ti.
K Sapdanga chuan, Mizoram kaihruai tawhtute chu mi chhuanawm leh mi ṭha tak tak, kohhran tan pawha mi ṭangkai tak an nih thu sawiin, "Rorel hi ngaiah neih theih a ni ang. Kawng an siam fuh thei lo a, lei an dawh fuh thei lo. Hengte hi an sual vang a ni lo a, ngaia an neih vang a ni," a ti a; kumin inthlanah chuan ngaia nei leh tur nge, kalphung thara kal tur, ngaihtuahna thar hmang tur bûk a nih dawn thu a sawi.
ZMP General Secretary chuan, inthlanah insem tlin inringte pawh an awm thu sawiin, "Chutianga sema tan chuan sorkar sum an chheprelh mek. An sum sem tumte hi khawia mi nge, eng atana hman tur nge kan ngaihtuah a ngai. Kan zin kawng leh feh kawngte a chhiat lai hian, sorkar chuan sum a nei reng a, inthlan dawna sem atan an chheprelh a, kan tuar mek a ni," a ti.
Mizoram mipuite chu misual awm khawm an ni lo tih sawiin Sapdanga chuan, "Enkawlna ṭha kan phu. Mahse, min enkawltute hian inthlan dawna lei theih ang lekah min ngai a ni. Mipuite'n phûr lo takin vote an thlak ṭhin. Tun ṭum inthlan turah erawh chuan ngaihtuahna thar hmangtute vote tur an awm dawn ta," a ti a; mipui tan phûr taka vote thlak theih a nih tawh dawn thu a sawi.
ZPM campaigner Vanneihtluanga pawhin thu sawiin, politics thila vantlang inkhawmah thu a sawi a rin ngai loh thu a sawi a, "Mizo mipuite hian thil ṭha kan duh a, ṭha duh lo ngawhngawl tlat an tam lo. Ṭha duh lo ila heti khawpa lian kan nei lo ang a, ṭha hi tlansan duh ila heti khawpa lian YMA kan nei lo ang. Mahse, politics-ah hi chuan ṭhat a har a ni a nge," a ti.
Vanneihtluanga chuan, Mizote chu mi thil sem dawng lo a, a semtu nih tum ṭhin hnam an nih thu sawiin, "A dawngtu nih kan tum ta hi politics vang a nihna chen a awm. Hetiang hian kan awm reng dawn em ni? Ram hruaitu ṭha kan nei thei. Kan vote hi kan ta a ni a, kan hralh phal dawn em ni," a ti a; ram ṭha, hruaitu ṭha nei tura inbuatsaih turin mipuite a sáwm.
ZPM campaigner dang PL Liandinga pawhin, Mizoram chu nuam se a duh thu sawiin, "Kawngte hi hei ai hian ṭha se ka duh. Darkar khatah km. 25-a chakin kan tlan a, kan hun kan hloh tam hle. Mi state anga kalkawng ṭha hi kan nei ve thei. Kan sorkar sikulte hi hetiang hi ni lo se, zirtirtu pakhatin zirlai 80 vel an enkawlte, zirtirtu hlawh tam takin zirlai enkawl tur an nei mumal lote hi hrehawm ka ti," a ti.
PL Liandinga chuan, inthlan dawna pawisa dawn politics-a hlâwkna awm chhuna ngaite an awm tawh thu sawiin, "Mahni vote pawh hum ngam lo khawpa rilru rethei i ni lo ang u. Kan ram siamṭha tura mi dik nia kan hriat pawh kan vote ngam lo ang maw?" a ti a; mi ṭhenkhatin vote lei theih anga mipui an bâwlna a dik a nih chuan a beidawnthlak tur thu a sawi.