Lirtheia tlân pelh diltute kawng kian duh lote hrem theih a ni

Lirthei khalhtute'n kawngpuia lirthei an khalh laiin, VIP an ni emaw, mimal lirthei emaw, eng lirthei pawh ni se, an hnunga tlante'n lehpelh an dil a, pelh theihna a awm reng chunga an kian duh lo a nih chuan dân hmanga hrem theih an ni.

RTI Act hmanga zawhna Aizawl Traffic SP office-in a chhan danin, The Rules of the Road Regulations 1989-a Rules no. 7-ah chuan, 'Overtaking not to be obstructed - The driver of motor vehicle shall not, when being overtaken or being passed by another vehicle, increase speed or do anything in any way to prevent the other vehicle from passing him,' tih a inziak a ni.

The Rules of the Road Regulations 1989-a Rules no. 7-in a tarlan awmzia chu, 'Intlan pelh theihna a awm a nih phawt chuan motor khalhtu reng rengin an hnung lam aṭanga tlan pêl turte'n ṭha taka an tlan pelh (overtake) theih nan a kian tur a ni,' tih a ni a; VIP a ni emaw, ni lo emaw, kawng kian ṭha duh lo chuan Road Regulations 1989 Rules no. 7 an bawhchhia tihna a ni.

The Rules of the Road Regulations 1989-a Rules no. 7 bawhchhiate hrem theih an nih leh nih loh zawhna chhangin SPIO leh Traffic SP chuan, "Hrem theih ni e. The Rules of the Road Regualtions 1989, Rules no. 7 bawhchhiate hi MV Act Section 177 hmangin hrem theih an ni," tiin a chháng.