House-in central college leh pisa hnuaiah Leilung fate duhsak a ngai pawimawh
Nimin Assembly session-ah member-te'n, Mizoram chhunga central-in college leh office a neihahte hna ruakah ram leilung fate duhsak an hlawh theihna tura ṭan lak pawimawh an tih thu an sawi hlawm.
Chief minister Lal Thanhawla chuan, 'Ram leilung fate duhsak ni rawh se' tih chu ziaka awm chi a nih leh nih loh chu a zawhna a nih thu sawiin, "Hmun dangah ziaka dah a awm a nih chuan kan sual ve tur a ni. Central pisaa OBC (other backward class) tana hna ruak awmte hi Mizoram miin an hnawhkhat zo lo, Gorkhali-te OBC nihna pe phal ila chuan thuhran, tun thleng chuan kan la pe phal si lo," a ti.
College of Veterinary Sciences & Animal Husbandry, Selesih din a nih pawhin an hotute nen ram leilung fate duhsak tura agreement an siam thu sawiin CM Hawla chuan, "Ram leilung fate duhsak ngei turin hma kan la, kan phak tâwk chinah chuan bawhzui ve reng. Leilung fate hi a theih chin chinah chuan an la a ni," a ti a; MNF member K Sangṭhuama'n Mizo aia Manipur lam mi an tam zawk thu a sawi chu a hriat ve loh thu a sawi.
Opposition group leader Vanlalzawma chuan, ram leilung fate duhsak an nih theihna atan theihtawp chhuah a ṭul thu sawiin, "Ka hriat danah chuan, NEHU-ah pawh hnam dang tan luh a har tawh hle, Khasi hoin an hauh na hle. Ziakin dah a awm em chu ka hre lo a, an zirlaite khu a hauh na ber an ni. Mizoram pawhin kan zirlaite kan hman ṭangkai a ṭha ang em?" a ti.
MNF member K Sangṭhuama chuan, an sawihona aṭangin member zawng zawngte an ṭanrual a ṭul thu sawiin, "He thilah hian kan vaiin kan ṭanrual a pawimawh," a ti a; zirlaite pawh an ṭhanharh a ngaia a hriat thu a sawi.
Labour & Employment minister H Rohluna pawhin MZU, Vety College, etc.-ah thiamna inang, a bik takin group C leh D hnaahte chuan Mizo ṭhalaite duhsak turin a thuneitute sorkar hotute'n an sawipui ṭhin thu House a hrilh.
INC member John Rotluangliana chuan, leilung fate duhsak chungchang chu ziaka dah kher a ngaih loh thu sawiin, "Mizote thinlungah ziak ila a ṭha mai, a hranpaa ziak kher loin," a ti.
Horticulture minister PC Lalthanliana chuan, Horticulture College kalpui mekah ram leilung fate duhsak an nih theihna atan theihtawp an chhuah thu sawiin, "A thawktu hi regular-a lak an la ni lo. Mizo fa qualify an awm chuan an la nghal zel," a ti a; ram leilung fate'n hna ruaka duhsak an hlawh theihna atan theihtawp an chhuah zel dawn thu a sawi.
Horticulture Minister sawi danin, College of Veterinary Sciences & Animal Husbandry hmuna kalpui mek Horticulture College chuan mamawh zualpuite dah hman a nih chuan a hmun nghet tur Thezawlah ngei June 15.7.2018 aṭanga class kalpui ṭan hman tum a ni.