Mizo Hnam Rûnah MPF an lêng
MNF party-in nimina Mizo Hnam Rûna an inkhawm chu Mizoram Peoples' Forum (MPF) hruaitute'n an hmanpui a; MPF hruaitute'n thu an sawi bakah, MNF senior vice president Tawnluia'n thu a sawi.
Tawnluia chuan, MPF leh political party-te thawhhonaah party tin president-te'n hming an ziak vek tih sawiin, "A kengkawhtu tur chu party tinte kan ni," a ti.
Tawnluia chuan, "MPF leh political party-te thawhhonaah hian party tin president-te signature a awm vek a, MPF hian party-te hi min barh lui lo a, thawhhona thuthlung kengkawhtu turte chu party tinte kan ni. MNF chu MPF thil tumah hian kan ken tel sa a a ni," a ti a; MPF chu inthlanna thianghlim a awm theihna tura hma an laknaahduhsakna a hlan.
MPF-ah eng party pawh an tel nghal vek tih sawiin Tawnluia chuan, "Inthlanna thianghlim leh felfai kan neih theihna tura pên chhuak MPF-te hnathawh hi a huaisen thlak a, mi sêl leh rêl luih luih huama an rawn pên chhuak hi a lawmawm hle. MPF hmalakna avang hian inpawhna leh thawhhona ṭha zawk a pian kan beisei a, an thuthlung hi huai takin kengkawh zel se kan duh a, Pathianin pawhin mal a sawm ngei kan ring," a ti.
MPF Governing Board member Rev. Lalrinmawia chuan, Mizoram politics a thianghlim lo tulh tulh tih sawiin, "A thianghlim dan tur kan ngaihtuah a, party unit nuaibo hialte kan rawt tawh a, hei em em chu party-te'n a theih loh thu min hrilh. Party-te nena kan thawhhona hi khawng taka vawn nun zel kan tum," a ti a; constituency leh district tinah MPF forum an din vek a, a viltu tur kan indin vek thu a sawi.
Rev. Lalrinmawia chuan, tun hmain house to house campaign neih remti lo tawh mah se, kumina inthlan turah chuan MPF kaihhruaina hnuaiah zalen taka campaign theih ni se, an tih thu sawiin, "Joint platform buatsaih pawh a harsat deuh ṭhin avangin tih tawh loh ni se kan ti a, kan campaign thupui chu 'Ram chu Lalpa ta a ni' tih hi a ni," a ti. Mizoramah inthlanna thianghlim a awm theih nan MPF-te chu an feh chhuah zel dawn thu leh, tuna MPF-a la tel lo kohhrante chu MPF-a tel tura an sáwm mek thu a sawi bawk.