KHAWTHLIR

Vanapa Hall Cheina zat
Art & Culture minister R Romawia chuan MNF member K Sangṭhuama zawhna chhangin, Vanapa Hall cheina atan cheng nuai 328 ruahman a nih thu House a hrilh a, "Departmental-a thawh a ni a, PWD-in an thawk. Hna hi zawh a la ni lo," a ti.

Thlai tiak leina
Horticulture minister PC Lalthanliana chuan MNF member Lalrinawma zawhna chhangin, thlai ṭiak leina atan kum 2013-2017 chhugin cheng nuai 3,894.01 sen a nih thu House a hrilh. Kum 2013-2017 chhunga thlai ṭiak leina atana sen tam ber ṭum kum 2014-2015 ah cheng nuai 1371.75 sen a ni.

Driver tha thlang
29th. Road Safety Week, 2018 pualin lirthei khalhtute fimkhur a ṭulzia leh dan zâwm tura infuih tharna atan Lungleia auto-rickshaw, taxi leh maxicab khaltu ṭha thlan a ni a, nimin khan Lunglei DC Lalzarmawii'n a pisaah lawmman a hlan. Lawmman dawngtute chu - auto-rickshaw-ah S Vanlalkima, Theiriat; taxi-ah R Lalthangmawia, Bualte leh, maxicab-ah C Lalruatsanga, Electric Vengte an ni.

Thisen pe
Falkawn Branch YMA chuan nimin khan an khuaah blood donation camp an huaihawt a, Aizawl Civil Hospital tan mipa 24 leh hmeichhia 10-in thisen unit 34 an pe.

Kawng siam phût
Hachhek Constituency Development Committee (HCDC) chuan thuchhuah siamin, Bairabi-Zamuang kawng chu ṭhál a nih tawh hnuah pawh siamṭhat a la ni lo tih sawiin, hriatthiam har an tih thu an tarlang a, a rang lama siam turin sorkar an phût.

Ramri sawipui
Ex-MNA Association hruaitute chuan nimin khan Home additional secretary Lalbiakzama a pisaah an kâwm a; vawiina Mizoram leh Assam chief secretary-te inbiak turah, ramri chungchanga an ngaih pawimawhte an sawipui. Lalbiakzama hi Mizoram Chief Secretary leh Assam Chief Secretary inbiaknaa tel tur zinga mi a ni.