ZPM ṭhalaiin CM thusawi hrethiam lo

Zoram Peoples' Move­ment (ZPM) ṭhalai chuan thuchhuah siamin, nimina Assembly budget session-ah chief minister Lal Thanhawla'n, vawiina New Delhi-a Mizoram leh Assam chief secretary-te inbiak turah Mizoram leh Assam ramri chungchanga an sawi dawn lo a, Zophaia law & order chungchang chiah an sawi dawn anga a sawi chu mak leh hriatthiam har an tih thu an tarlang.

ZPM ṭhalai chuan, "Zoram mipuiin kan beisei leh thlir ber, Assam nena kan inrina laia MZP-te'n chawlhbûk sak chung­chang leh ramri chungchang an sawi dawn emaw kan ti a, kan beisei ang lo taka Chief Minister berin a sawi hi pawi kan ti a, a beidawnthlak kan ti tak zet a ni," an ti.

Assam sorkarin Zophaiah kawng cheiin kut an thlak mek tih sawiin ZPM ṭhalaite chuan, "Kan sorkar hrawn mek hian eng vanga khap ngam lo nge tih kan zawt a ni. Hetianga ram leh hnam humhalh ngam lo sorkar kan hrawn mek hi pawi kan tiin lungchhiatthlak kan ti tak zet a ni," an ti a; ZPM an sorkar chuan Mizoram ramri dik tak an chingfel ngei ang tih Mizoram mipui an hriattir tih an sawi bawk.