ITI building dinhmun a chiang lo

Labour, Employment, Skills Development & Entrepreneurship (LESDE) minister H Rohluna chuan, NH-54 zauh hna thawh a nih dawn avangin ITI, Chhiahtlanga administartive building sak tawh chu ṭhiah a ngaih dawn leh dawn loh a la hriat loh thu House a hrilh.

MNF member Lalrinawma zawhna chhangin H Rohluna chuan, Chhiahtlanga ITI building sak mek agreement amount chu nuai 326.56 a nih thu a sawi a, "Building pahnih sak turah pakhat zawk hi physical achievment 95% a ni a, pakhat zawk erawh sak a la ni lo. Financial achievement chu 88.9% a ni a, contractor hnenah cheng nuai 290.64 pek a ni tawh," a ti.

Zawh belhna chhangin H Rohluna chuan, NH-54 kawngpui zauh turin administrative building sak tawh chu a su tura ngaih a nih thu sawiin, "Hei vang hian hna thawh chhunzawm a ni hrih lo. Kawng zauh tur hi tihfel a la nih loh avangin thil a la chiang thei lo," a ti a, tihchian a nih veleh hmun danga insawn emaw, sak chhunzawm emaw turah thutlukna siam a nih tur thu a sawi.