MRHG Director General post siamah Dan bawhchhiatna a awm lo - HM Zira

21st March, 2018

Home minister R Lalzirliana chuan MNF member Lalruatkima zawhna chhangin, Mizoram Home Guard (MRHG) Director General post August 27, 2014 aṭangin siam a nih thu leh, Director General post siam a nih avangin Home Guard Act, 1985 bawhchhiatna a awm lo niin a sawi.

Nimina khan Assembly session-ah Lalruatkima chuan, MRHG-a Director General post siam chu High Court-ah khin a ni a, High Court chuan Director General post siamna chu a paihthla nia a hriat thu a sawi.

Hemi chungchangah hian Home Minister chuan, "High Court-ah khin a ni a, tunah chuan a fel tawh a, kalpui zel tum a ni a, Director General (Civil Defence) tih a ni ang," a ti.

R Lalzirliana chuan, MRHG-ah Director General post siam ni mah se, tuna a awm sate post a ei hêk loh thu sawiin, "A awm sate chu an awm zel ang," a ti a; tuna post awm mekte pawh a hming thlak a nih thu te, MRHG chungchanga dante chu siamṭhat tum a nih thu leh dan chu a siamtute'n an tihdanglam theih thu a sawi.

Home Minister chuan, Mizoram Police Service (MPS)-te chu state administration-ah a khaidingtu berte zinga mi an nih thu a sawi a, chutih laiin, IPS-te erawh chu Mizoramah awm ve ṭhin mah se, an awm hun chhung a rei loh thu a sawi a, "MPS-te hi an level service dangte'n secretary post an nei tawh a, anni pawh hian secretary level an neih ve a ngai kan ti a, Director General post siam a ni," a ti.

Gauhati High Court (GHC), Aizawl Bench chuan kumin khan thutlukna tichhuakin, Mizoram sorkarin Mizoram Police Service (MPS)-te tana Mizoram Home Guard (MRHG)-a Director General post a siam dan chu dan kalh a nih thu a puang.

Mizoram Home Guard-a Director General post siam a nih dan hi Mizoram Home Guard Association chuan an khing a ni. Court chuan Mizoram Home Guards Act, 1985-ah MRHG chu Director General enkawlna hnuaiah a awm theih loh thu a tarlang a, "State sorkarin Commandant General aia thuneihna sang zawng neiin tumah Director General-ah a ruat thei lo," a ti a; Director General chu Commandant General aia dinhmun sanga dah a nih dawn chuan dan tihdanglam a ṭul thu a tarlang a ni.