Kum 2015-2018 chhungin Police 435 an thi
Home minister R Lalzirliana chuan nimina Assembly session-ah MNF member Dr K Beichhua zawhna chhangin, kum 2015-2018 chhungin Mizoram police zinga 435 an thih thu House a hrilh.
Dr K Beichhua'n Mizoram police thi zinga rál kuta thi leh zu kaihhnawiha thi zat a zawh belhna chhangin R Lalzirliana chuan, rál kuta thi zat a hre chiang rih lo a, a hriat chian chu Zokhawthiang daia hel hoin MLA-te leh police an ambush ṭuma police pathum thite an nih thu a sawi a, "Zu vanga thi chiang taka hriat kan nei lo. Natna chi hrang hrang vanga thite an ni," a ti.
Kum 2015-2018 chhunga police thite eng party sorkar laia lak nge tih Congress MLA ṭhenkhatin an zawhna chhangin R Lalzirliana chuan, Congress sorkar hmasa lamah Mizorama police battalion pakhat, 1st. IR battalion chiah din a ni a, police thite chu chumi hnu lama lakte vek an nih thu a sawi.
Home Minister chuan, tun dinhmunah Mizoram sorkarin police hna ruak 2,428 a nei tih a sawi a; police post ruak hnawhkhat turin tun hnaiah 400 chuang lak a nih thu te, tunah SI, ASI leh a dangte lak tum mek a nih thu te, Mizoram Home Guard aṭanga police-a luh dan (quota) a awm thute a sawi bawk.