KLHAWTHLIR

Eng luh lohna Khaw paruk
Power & Electricity minister R Lalzirliana chuan, West Tuipui constituency chhungah electric current la luh lohna khua paruk a awm thu a sawi a, "Kumin chhunga tihen vek tum a ni," a ti. West Tuipui bial chhunga electric current la luh lohna khuate chu - Bandiasora, Puankhai, Thanzamasora, Ukdasuri, Hmundo leh Saisen khuate a ni.

Heroin man
Central YMA hnuaia SRS duty-te leh Excise & Narcotics department ṭangkawp chuan March 19, Thawhṭanni tlai khan Rodingliana leh Lalnunzira te hnen aṭangin heroin hawng 2 leh can 25 an man. Heroin an man hlut zawng hi Aizawla hralhna and chuan Rs. 1,32,500 hû a ni.

Chawngteah EVM
Chakma Autonomous District Council (CADC) inthlana hman tur electronic voting machine (EVM) 124 chu, nimin khan Lawngtlai DC office strong room aṭangin Chawngte-ah phurh thlen a ni. CADC-ah hian MDC bial 20 a awm a, inthlannaa hman tur electoral roll tihchhuahah chuan voter mipa 15,478 leh hmeichhia 15,087, an vaiin voter 30,565 an awm a ni.

Khuahkhirh lo
Nimina Assembly session-ah Health minister Lal Thanzara chuan MPC member Lalthanliana zawhna ziaka chhangin, Mizoram sorkarin private clinic siamte khuahkhirhna dan a nei lo tih a tarlang.

Thisen pe
Phulpui Field Veng Branch KṬP chuan an silver jubilee lawm nan nimin khan an Kohhran Hall-ah blood donation camp an huaihawt a, mipa 36 leh hmeichhia pathumte'n Synod Hospital tan thisen unit 39 an pe.