PRISM-in minister pahnih demand House-a pass tlakah an ngai lo

PRISM chuan thuchhuah siamin, Assembly session neih meka pharh tur, minister pahnih Zodintluanga leh KS Thanga te demand chu a dik thei loa ngaiin, pawm tlâka an ngaih loh thu an tarlang.

PRISM tarlan danin, Zodintluanga department chan Sports and Youth Services-ah medical treatment-a cheng nuai 30.93 aia tlem lo sum mamawh a nih laiin, budget-ah nuai 16.50 chauh dah a ni a; other charges-ah nuai 413.03 aia tlem lo mamawh a nih laiin nuai 150 dah a ni. "Thawktu bàn ṭhen tur awm ni âwm takin grants-in-aid-general (salary)-a cheng nuai 384.35 aia tlem lo mamawhah nuai 341.07 chauh dah a ni," an ti.

PHE-ah salaries-ah cheng nuai 7,104 aia tlem lo mamawh a nih laiin nuai 6,414.86 dah a ni a; UDPA-ah wages-ah nuai 350.04 aia tlem lo mamawh laiin nuai 297.72 a ni. UDPA-ah hian mi tam takin hna an chán dawn nia ngaih theihin grants-in-aid-general (non salary)-ah kum kal laiah nuai 5,085.77 mamawh a nih laiin, cheng nuai 3,102.08 chauh dah a nih thu an tarlang.

PRISM tarlan danin, KS Thanga department chan Agriculture budget-ah salaries, wages leh medical treatment-a senso tur indaih lo saa dah a ni a; mi tam tak eizawnna chhu chat turin grants-in-aid-general (salary)-a kum kallaia cheng nuai 841.35 a nih laiin, cheng nuai 420 chauh dah a ni.

Land Resources, Soil and Water Conservation budget-ah wages, medical treatment leh domestic travel expense-te indaih lo saa dah a ni a; Irrigation and Water Resources Department budget-ah pawh indaih lo sa turin, kum kal laia medical treatment-a cheng nuai 61.71 hmannaah nuai 19.05 dah a ni.