ZPM a sorkar chuan ramri humhim turin chak takin ke kan pên dawn - Vanlalhlana

Nimin khan MPC party chuan an pisaah chhung inkhawm an nei a; MPC senior vice president Vanlalhlana chuan, ṭangrual pawl ZPM an sorkar chuan Mizoram humhim turin chak taka ke an pên tur thu a sawi.

Vanlalhlana chuan, chief minister Ch. Chhung­a a nih laiin ramri chungchang Fact & Finding Committee, Rev. Zairema kaihhruai a din thu sawiin, "Central-ah memorandum an thehlut a. Brig. T Sailo pawhin CM a nih laiin Boundary Commission, Brig. Vankunga kaihhruai a din a, report an thehlut hman ta lo a, amah ngei hian Mizoram leh Assam ramri lungphun dik lo tichhiain, Dholai-ah a dik zawk a siam a ni," a ti.

MNF president Zo­ramthanga’n Vairengte dáia MZP-in chawlhbûk an sak a ṭhiahsak bakah, all party & NGO memorandum a tizuzi tih sawiin Vanlalhlana chuan, "Central-in ramri buai chung­chang sawi turin Chief Secretary a koh laiin, Pu Lal Thanhawla chuan law & order harsatna sawitir a tum thung. Tun dinhmun min hruai thleng a, kan thlen chin leh hmalakna pawh kan hrethiam ta lo," a ti a; Chief Minister lo ni tawhte ramri vei dan leh hmalak dan a inan loh thu a sawi.