Mamit IPRO office hawn a ni

Mamita Information & Public Relations department office building thar chu nimin khan IPR director David L Thangliana'n a hawng. IPR Director hi Mamit MJA-te nen an inkâwm nghal.

David L Thangliana chuan, Mamita IPR department chu thawktu tlemtê ni mah se, Mamita sorkar hmalakna hrang hrang bakah, pawl hrang hrangte hmalakna leh hnathawhte mipui hriata puang darhtu an nih thu a sawi a; Mizoram sorkar hmalakna pholanna Mizoram Hmasawnna Lam­tluang (MHL) tihchhuah ṭhin chu lo ngaihven a, an hmalaknate pholang turin kalkhawmte a sáwm.

Mamit MJA president C Lalramdinzela chuan, IPR department leh MJA-te chu department khat ang maia thawkho an nih thu sawiin, "Kan mamawhte pa chan chang taka min ngaihtuahsak ṭhin avangin kan lawm hle a ni," a ti a; building hawn theih a nihna tura sûl sutu officer lo awm hmasate chungah lawmthu a sawi.

IPR building hawn tak hi May 23, 2011-ah sak ṭan a ni a, a sakna atan cheng nuai 127 sên a ni.