Zokhawsanga AR hmun tur peih a la ni lo
Home minister R Lalzirliana chuan MNF member Lalrinawma zawhna chhangin, Zokhawsanga Assam Rifles complex chu sak zawh a la ni lo tih Assembly House a hrilh a; Mizoram sorkar hnuaia khawih a nih loh avangin sum ruahman zat leh sum sen tawh zat a sawi theih loh thu a sawi.
Assam Rifles-te Zokhawsanga an insawn theih hun tur zawhna chhangin R Lalzirliana chuan, "Tunah hian state sorkar leh Assam Rifles-te MoU sign tur buaipui mek a ni a. MoU sign fel a nih hunah leh EPIL-in a sak hna an thawh zawh hunah insawn chhuah theih a ni ang," a ti.
Zawh belhna chhangin Home Minister chuan, Assam Rifles-te Aizawl laili
aṭanga sawn chhuah chu an duh tláng tih a sawi rualin, harsatna a awm ve ṭhin tih a sawi a, "A tirah chuan tuna an awmna hi chhuahsan vek tura beisei a ni a, mahse, chhuahsan loh tura duh an neih belh zel a ni," a ti. Zokhawsanga AR hmun turah kum 2011-ah electrification tih zawh a nih tawh thu te, tuna state sorkarin a tih tur la tih zawh loh chu PHE leh PWD-in cheng nuai 50 vel ve ve an la mamawh chiah a nih tawh thu a sawi bawk.
Land Revenue & Settlement minister R Romawia pawhin, Assam Rifles insawn dan tur leh ram chungchang ngaihtuah turin committee din a ni a, vawi 2/3 an ṭhut tawh thu a sawi a, "Assam Rifles lamin thil an ching pawr leh ṭhin a, chhuanlam tur an zawng an zawng a, a buaithlak khawp mai," a ti.