Hmarchhak agriculture hmasawn dan sawihonaah CM leh Agriculture minister an tel

Sorkar laipuia minister pahnih - DoNER minister G Kishan Reddy leh Agriculture & Farmers Welfare minister Narendra Singh Tomar te hoin August 31, Thawhlehni khan hmarchhak state chief minister-te'n online kaltlangin agriculture tihhmasawn dan tur an sawiho a; Mizoram aṭangin chief minister Zoramthanga leh Agriculture minister C Lalrinsanga te an tel.

DoNER minister G Kishan Reddy chuan, rualkhai zawka state-te'n DoNER kaltlanga ṭanpuina an hmuh theih nan hmalak a ṭul thu leh ṭanrual a pawimawh thu a sawi a, "Tun hnaia National Mission on Edible Oils - oil palm kalpui tura sorkar laipuiin ruahmanna a siam chu a hlawhtlin theih nan hmarchhak state-te an pawimawh," a ti a; Mizoram chu oil palm chìn kawngah sûlhnu ṭha tak nei tawh leh state dangte tan entawntlak a nih thu a sawi.

CM Zoramthanga chuan, hmarchhak state-te tan North Eastern Council leh DoNER-a sum dah chu beitham a tih thu sawiin, "Heng aṭanga state tinte'n an dawn chu hmasawnna thlen turin duhkhawp a tling lo a, ennawn a ṭul," a ti a; 10% GBS aṭanga tlang ram state-a hmasawnna ruhrel siam ṭul a tihte a sawi lang.

Meeting-ah hian sorkar laipuia Department of Agriculture & Farmer's Welfare aṭanga 10% GBS chu a ṭangkai thei bera hman chungchang te, mau leh oil palm tihhmasawn dan tur te, horticulture leh organic farming tihhmasawn chungchangte sawiho a ni.

CM Zoramthanga leh minister C Lalrinsanga te hi additional chief secretary JC Ramthanga, Agriculture secretary J Hmingthanmawia, Planning secretary Lalmalsawma Pachuau bakah, Horticulture leh Agriculture department hotute'n an ṭawiawm a ni.