Covid-19 vei, chhuahtir leh thi Tam ber thla - August 2021

Kumin August thla chhung khan Mizoramah Covid-19 vei mi 21,073 hmuh chhuah a nih laiin, mi 23,783 chhuahtir an ni a, mi 69 an thi thung. Hripui vei hmuh chhuah, chhuahtir leh thi zat a tam ber thla a ni.

August 2021 chhunga hripui vei hmuh chhuah zat 21,073 hi chawhrualin ni tin mi 679 chuang hret (679.77) hmuh chhuah an awm ang a ni a; a hmaa hmuh chhuah tam ber thla, July 2021-a hmuh chhuah 18,434 aiin 2,639-in a tam zawk.

Covid-19 vei dam tawh leh hripui laka fihlim tawh chhuahtir zat pawh kumin August thlaah tam berin, mi 23,783 chhuahtir an ni a, chawhrualin ni tin mi 767 chuang hret (767.19) chhuahtir an awm ang a ni. August thla chhunga Covid-19 vei hmuh chhuah aiin chhuahtir zat 2,710-in a tam zawk a ni.

Kumin August thla chhung khan Covid-19 vei mi 69 thiin, thi an tam ber thla a ni a; thi an tam ber ni, August ni 3 leh ni 28-ah mi panga ve ve an thi a, thi awm loh ní ni khat chiah a awm a, August ni 17 a ni.