HTE Minister leh Union Minister-in MZU Southern Campus sawi dûn

Higher & Technical Education minister Dr R Lalthangliana chuan nimin khan New Delhi-ah Union Education minister Dharmendra Pradhan a kâwm a, Mizoram University (MZU) Southern Campus, Lungleia din tur a sawipui.

Dr R Lalthangliana hian MZU Southern Campus dinna atana senso tur cheng vbc. 400 dilna thehlut tawh leh mamawh chi hrang hrang - thawktu lak, hostel leh faculty building sakna tur chungchangte a sawipui a, "Mizoram sorkarin MZU dinna tur ram a tifel tawh a ni," tiin, chak taka hmalakpui turin Union Minister a ngen.

RUSA hnuaia assistant professor-te hlawh tur pe chhuak tura ngenin HTE Minister chuan, "RUSA-3 rawn kalpui leh ngei ni se. RUSA-1 leh RUSA-2 hi vawi khat mah thlir lêtna minister level-ah neih a la ni lo hi a mak a, neih ngei ni se. Hmarchhak state-a HTE minister-te pual bikin meeting koh theih ni se," a ti. Union Minister chuan, Dr R Lalthangliana rawtna leh ngennate chu tihhlawhtlin ngei a tum thu a sawi.

Dr R Lalthangliana chuan, literacy rate-ah Mizoram chu India ramah a ṭhat viau laiin, higher education-a gross enrolment ratio-ah national level a phak loh thu a sawi a; hemi chungchangah hian Dharmendra Pradhan chuan, Mizorama higher education hmasawnna ngaih pawimawh a nih tur thu a hrilh.

HTE Minister hian minister of state for Road Transport & Highways pawh hmuin, Tuipui-D (Darzokai) lei cheng vbc. 80 sénga dawhna tur a sawipui a; Union Minister chuan a rang thei ang bera hma lakpui turin a lo tiam a ni.

Dr R Lalthangliana hian US Embassy pawh tlawhin, thawktute chuan kawng hrang hrangah, a bikin health sector-ah Mizoram tana hmalakpui theih tur an neih leh ṭangkai turte an lo hrilh. NITI Aayog member Dr Vinod K Paul, Union Textiles secretary Upendra Prasad leh ICMR hotute pawh kâwmin, Mizoram mamawhte a thlen bawk.