SWD Minister-in Poshan Maah leh Matru Vandana Saptah a hawng

Women & Child Development department chuan nimin aṭang khan sorkar laipui hnuaia scheme pahnih - Poshan Abhiyaan leh Pradhan Mantri Matru Vandana Yojana (PMMVY) hnuaiah Rashtriya Poshan Maah (National Nutrition Month) leh Matru Vandana Saptah-te an hmang ṭan a; Social Welfare minister Dr K Beichhua'n a pisa aṭangin a hawng.

Minister Dr K Beichhua chuan, kumina Rashtriya Poshan Maah leh Mantru Vandhana Saptaah hman chhungin Mizorama naupang chak lo bik (SAM children)-te enkawlna pekah nasa zawka hma la tur te, anemia (nu nau pâi leh tleirawla thisen tlâkchhamna) a awm tawh loh nan theihtawp chhuah lehzual turtein thawktute a sáwm.

Dr K Beichhua chuan, Nutri-Garden (Kan Wadi, Kan Huan) siamah ṭan la lehzual turin thawktute a fuih a, Mantru Vandhana Saptaah-ah pawh nu leh nautete'n hrisel ṭha an neih zel theih nan chak zawka hma la turin a chah. Mizoram chu ram hrisel a nih theih nan theihtawp chhuah lehzual tur leh an hma zawna tih tur awmte ṭhahnemngai taka thawk zel turin a chah bawk.

Social Welfare Minister chuan, Ministry of Women & Child Development hnuaiah Mizorama Women & Child Development chu a ti ṭha pawlah a tel thei zel tih sawiin, "Hengte hi WCD staff-te leh kan thawhpui department hrang hrang - Health, AYUSH leh UDPA department-te leh, bank leh khawtlanga kan thawhpui NGO-te min ṭawiawmna vang liau liau a ni," a ti.

Rashtriya Poshan Maah hi India ram pumah September thla chhunga hman tur a ni a, thupui chu ‘Converging towards a healthy walk through life’ tih a ni. Matru Vandana Saptah chu September 1-7 chhunga hman tur a ni thung a, thupui chu 'Mother power, nation power' tih a ni.

Poshan Abhiyaan-in a thil tum ber chu - naupanga chak lohna chi hrang hrang thleng ṭhin - ṭhanṭhú, zãng lutuk leh chêr lutuk tihtlem, nu leh tleirawla thisen tlâkchham (anemia) tihhniamte a ni a; PMMVY-in a tum ber chu - nau pai/pawmte hriselna ngaih pawimawh niin, anganwadi centre-a inziah luhin fa tìr paite'n Rs. 5,000 an dawng thei a ni.